खोज

दाङ, २६ मंसिर ।

भूकम्पबाट प्रभावित जिल्ला जाजरकोट र रुकुम पश्चिममा बृहत प्रजनन स्वास्थ्य सेवा प्रदान गर्न गएको नेपाल परिवार नियोजन संघ दाङको टोलीले पहिलो चरणमा १५ स्थानबाट २ हजार ४ सय बढी प्रभावितलाई सेवा दिएको छ ।

गत मंसिर ११ गते भेरी नगरपालिका जाजरकोटको समन्वयमा भेरी नगरपालिका वडा नम्बर ४ बोहोरा गाउँबाट वृहत प्रजनन् स्वास्थ्य शिविर शुरु गरेको टोलीले सोमबार पहिलो चरणको अभियान सम्पन्न गरेको छ ।

नेपाल परिवार नियोजन संघको आयोजना, आईपिपिएफ स्प्रीन्ट परियोजनाको सहयोगमा यसबीचमा भेरी नगरपालिका, नलगाड नगरपालिका बारेकोट गाउँपालिका जाजरकोट तथा आठबिसकोट नगरपालिका रुकुम पश्चिमको व्यवस्थापनमा भूकम्पले अति प्रभावित १५ स्थानमा पहिलो चरणको बृहत प्रजनन स्वास्थ्य शिविर संचालन गरीसेवा प्रदान गरिएको छ ।

शिविर संचालनबाट महिला २ हजार ६२ र पुरुष ३ सय ४० गरि जम्मा २ हजार ४ सय २ जनाले सेवा प्राप्त गरेका छन् । शिविरका साथै नेपाल परिवार नियोजन संघले भूकम्प प्रभावित समुदायका व्यक्ति तथा विद्यार्थीहरुलाई प्रजनन स्वास्थ्य सरसफाई लगायत स्वास्थ्य सम्बन्धि ३६ वटा सचेतना मुलक कार्यक्रममार्फत १ हजार २५ जनालाई सचेतिकरण समेत गरेको नेपाल परिवार नियोजन संघ दाङ शाखा प्रवन्धक वसन्त खनालले जानकारी दिए ।

शिविर भेरी नगरपालिकाको बोहोरा गाउँ, स्याला, बाहुनथाना, पिपेगाउँ, नलगाड नगरपालिकाको अनापानी, कैना सिर्के, दल्लि, बारेकोट गाउँपालिकाको सक्ला सेपुखोला, लिम्सा र रामिडाँडा तथा रुकुम पश्चिमको आठबीसकोट नगरपालिकाको डाँडागाउँ, गाउँबारी, बार्खु र घेत्मामा गरिएको थियो ।

विपतको समयमा प्रजनन स्वास्थ्य सेवाको बढी आवश्यकता हुने हँुदा शिविर आयोजना गरिएको र शिविरबाट लैङ्गिक हिंसा, गर्भवति महिला, सुत्केरी महिला, किशोरकिशोरीलाई प्रजनन् स्वास्थ्य सम्बन्धि सेवा र परामर्श, यौन रोग तथा एचआइभी एड्स सम्बन्धि परामर्श तथा उपचार सेवा, परिवार नियोजन सेवा, पाठेघर मुखको क्यान्सरको स्क्रिनिङ सेवा लगायत विभिन्न सेवाहरु प्रदान गरिएको शाखा प्रबन्धक खनालले जानकारी दिए ।

भूकम्प प्रभावित क्षेत्रका लक्षित समुदायलाई ४८ पटक शिविर आयोजना गरेर स्वास्थ्य सेवा प्रदान गर्ने गरी दाङबाट स्वास्थ्यकर्मीको टोली सो क्षेत्रमा पुगेको हो । नेपाल परिवार नियोजन संघका परियोजना प्रमुख डा. ओम महर्जनका अनुसार भूकम्पबाट अति प्रभावित क्षेत्रहरु जाजरकोटको नलगाड नगरपालिका, बारेकोट गाउँपालिका र रुकुम पश्चिमको आठबीसकोट नगरपालिका र सानीभेरी नगरपालिकाका ३३ स्थानमा अझै शिविर सन्चालन हुने उनले बताए ।

शिविरमा नेपाल परिवार नियोजन संघबाट स्त्री रोग विशेषज्ञ डा. हेमा छन्त्यालको नेतृत्वमा स्वास्थ्यकर्मीको टोलिले सेवा प्रदान गरिरहेको छ । गत कार्तिक १७ गते राति जाजरकोटको रामीडाँडा केन्द्र विन्दु भएर गएको भूकम्पका कारण जाजरकोट र रुकुमपश्चिममा ठूलो जनधनको क्षति भएको छ । यसबाट धेरै घाईते हुनुका साथै घरबार विहीन बनेका छन् । जसका कारण प्रभावितहरुलाई स्वास्थ्य सेवाका साथै परामर्शको आवश्यकता रहेको छ ।