खोज

भैरहवा, १३ मंसिर ।

स्वास्थ्य सेवा प्रवाहमा युनिभर्सल कलेज अफ मेडिकल साइन्सेज (शिक्षण अस्पताल भैरहवा) लाई ‘उत्कृष्ट’ सम्मान प्रदान गरिएको छ ।

नेपाल सरकार, श्रम, रोजगार तथा सामाजिक सुरक्षा मन्त्रालय अन्तर्गत सामाजिक सुरक्षा कोषले काठमाडौंमा आयोजना गरेको ‘छैठोै सामाजिक सुरक्षा दिवस २०८० को अवसरमा लुम्बिनी प्रदेश अन्तर्गत कोषमा सुचीकृत योगदानकर्ताहरुलाई स्वास्थ्य सेवा प्रवाहको आधारमा यस युसिएमएस, शिक्षण अस्पताल, भैरहवालाई ‘उत्कृष्ट’ सम्मान प्रदान गरेको हो । सो सम्मान पत्र प्रधानमन्त्री पुष्पकमल दाहाल ‘प्रचण्ड’बाट अस्पतालका प्रमुख कार्यकारी अधिकृत अजय कुमार पिएसलाई प्रदान गरिएको थियो ।

अस्पतालले योगदानमा आधारित सामाजिक सुरक्षा ऐनले औपचारिक र अनौपचारिक क्षेत्रका श्रमिक तथा स्वरोजगारमा रहेका व्यक्तिलाई सामाजिक सुरक्षा योजना अन्तर्गत औषधी उपचार तथा स्वास्थ्य सुरक्षा योजना, मातृत्व सुरक्षा योजना, दुर्घटना सुरक्षा योजना अनुरुप गुणस्तरीय र प्रभावकारी स्वास्थ्य उपचार सेवा प्रदान गर्न कटिबद्ध रहेको उल्लेख गरेको छ ।

२०७९ वैशाख १४ गतेबाट यस अस्पतालमा नेपाल सरकारको सामाजिक सुरक्षा कोष अन्तर्गत स्वास्थ्य सेवा सुचारु भए पश्चात हाल सम्म आकस्मिक सेवा इमर्जेन्सीबाट कुल २३७ र बहिरगं सेवा ओपिडीबाट कुल ४ हजार ५२७ जना गरी जम्मा ४ हजार ७६४ जना श्रमिकहरुले अस्पतालको स्वास्थ्य सेवाबाट लाभन्वित भएका छन् । जसबाट यस अस्पतालले सामाजिक सुरक्षा कोषबाट हालसम्म करिब १ करोड ५३ लाख २ सय ५० रुपियाँ उपचार बापत प्राप्त गरेको युसिएमएस प्रशासनले जनाएको छ ।

शान्तिका अग्रदुत भगवान गौतमबुद्धको जन्मस्थल लुम्बिनीको प्रवेशद्वार भैरहवामा वि.सं. २०५४ सालमा स्थापना भई स्वास्थ्य सेवामा निजी क्षेत्रवाट सञ्चालित त्रिभुवन विश्वविद्यालयबाट सम्बन्धन प्राप्त नेपालको पहिलो मेडिकल कलेज अन्तर्राष्ट्रिय स्तरको दक्ष जनशक्ति उत्पादनका साथै सर्वसुलभ तथा गुणस्तरीय स्वास्थ्य सेवा प्रदान गर्दै आइरहेको छ ।