खोज

सन्धिखर्क, ८ मंसिर ।

कांग्रेस महामन्त्री गगन थापाले वर्तमान व्यवस्थाको विकल्प खोज्नेतिर लागेमा फेरि अर्को जुनी खेर जाने बताएका छन् ।

कांग्रेस अर्घाखाँचीको प्रथम अधिवेशनलाई शुक्रबार सन्धिखर्कमा सम्बोधन गर्दै उनले जनतालाई दास बनाएर शासन गर्ने राजा अहिलेको आवश्यकता नभएको बताए ।

राजाले दिएको यातना, उनले गरेको कुशासन, उनका गतिविधिबाट जनता आजित बनेर सडकमा ओर्लिएको स्मरण गर्दै थापाले राजा आउने र ल्याउने बाटो अहिलेको आवश्यकता नभएको बताए । राजाको पालामा भन्दा प्रजातन्त्र आए पश्चात देशमा धेरै विकास भएको भन्दै उनले अहिले कतिपय तत्वले उल्टो पाठ पढाई रहेको बताएका छन् । ‘राजा ल्याउने बेमौसमी ढोल पिट्न खोजिएको छ,‘थापाले भने, ‘राजा फालिएको, राजाकै व्यवहारका कारण हो । पछाडी फर्कनु मुर्खता हुन्छ ।’

हुकुमी शैली अबको युगमा सम्भव नभएको भन्दै उनले सिंहदरबारमा बसेर जनतालाई यातना दिएजस्तोे सजिलो उनीहरुका आवश्यकता पूरा गर्न नभएको बताए । नेपालमा एउटै व्यक्ति चार÷पाँच पटक प्रधानमन्त्री हुनुले जनतामा राम्रो परिणाम दिन नसकेको थापाको भनाई छ । वर्तमान र भूतपूर्व प्रधानमन्त्रीहरुले अब हामी प्रधानमन्त्री हुँदैनौं भनेर निर्णय गरेमा सबै समस्या समाधान हुने थापाको तर्क छ । पछिल्लो समय नागरिकमा आक्रोश, भ्रम र निराशा भएकाले त्यसलाई सरकारले सम्बोधन गर्नुपर्ने उनको भनाइ थियो ।

सहकारीबाट ठगिएका व्यक्ति, व्यवसाय, कृषक, वैदेशिक रोजगारी सबैमा पछिल्लो समय निराशामात्रै देखिएका नागरिकलाई सरकार भएको महसुस गराउन उनले सरकारलाई अनुरोध गरे । भष्टचारका काण्डैकाण्डले निराशा छाएकाले भ्रष्ट्राचार गर्ने, भुटानी शरणार्थी काण्डलगायत बाहिर आएका सबै काण्डमा जोसुकै, जुन पार्टीको नेता भए पनि समातेर कारबाही हुनुपर्ने बताए ।

यस्तै कांग्रेस नेता चन्द्र भण्डारीले भ्रष्टाचार गर्ने नेताको तीन पुस्तालाई छोड्न नहुने बताए । जनताको करमा रजार्इं गर्नेलाई माफ गर्न नसकिने भन्दै भण्डारीले तीन पुस्ता पिर्नेगरी कारवाही गर्नुपर्ने बताए । भ्रष्टाचार गर्ने केही सीमित व्यक्तिहरुले गर्दा त्यसको भारी आफुहरुले समेत बोक्नु परेको भन्दै नेता भण्डारीले भ्रष्टाचार गर्नेलाई त्यसै छोड्न नहुने बताए ।