खोज

बुटवल, ७ मंसिर ।

विश्वभर नै धेरै मानव मृत्यु हुने कारणका रुपमा नसर्ने रोग कारण बनेको छ । नेपाल पनि यसबाट अछुतो छैन । स्वास्थ्य मन्त्रालयको एक तथ्यांक अनुसार नेपालमा वर्सेनि नसर्ने रोगका कारण ४२ प्रतिशत मानिसको मृत्यु हुने गरेको छ । अस्पताल पुग्ने विरामीमध्ये करिब ८१.५ प्रतिशत तथा ती मध्ये अन्तरंग सेवा लिने ८८ प्रतिशतलाई नसर्ने रोगको समस्या छ । नेपालमा दम, मुुटु, मृगौला, मधुमेह, पक्षघात, क्यान्सर लगायतका नसर्ने रोगको जोखिम बढ्दो छ ।

विश्व मधुमेह दिवसको अवसरमा केन सेन्टरले बुटवलमा सचेतना जगाउने उद्देश्यका साथ निःशुल्क स्वस्थ्य परीक्षण तथा अभिमुखिकरण चलाएको छ । चेन होटल पौवाको सहकार्यमा केन सेन्टरले मंगलबार र बुधबार (दुई दिने) मधुमेह र मृगौला सम्बन्धी निःशुल्क रगत र पिसाव जाँच गरेको छ । पौवाको योगीकुटी शाखामा संचालन गरिएको शिविरमा तिलोत्तमाका २ सय ३२ जना स्थानीयले सेवा लिएकामध्ये १४ प्रतिशतमा मधुमेह देखिएको केन सेन्टरका अध्यक्ष दिनेश कक्षपतीले बताए ।

कक्षपतीका अनुसार त्यसमध्येमा पनि मधुमेह संक्रमितसंगै २ प्रतिशतमा मृगौलामा सामान्य असर देखिएको छ । पछिल्लो समय नेपालीको प्रत्येक घरमा दीर्घरोगका रुपमा मधुमेह र उच्च रक्तचापका बिरामी बढेको तथ्यांकबाट प्रष्ट हुने उनको दाबी छ । ४० वर्ष माथिका व्यक्तिहरुमा सामान्य मधुमेह मात्रा देखिएको समयमा सही परामर्श र जीवनशैली व्यवस्थापन गर्न सके पूर्ण निमन्त्रण हुने उनले बताए । बिगत दुई दशकदेखि मधुमेह र मृगौला रोगबारे अभियान चलाएका कक्षपतीले तिलोत्तमामा मधुमेह र मृगौला बिरामीको संख्या धेरै देखिएको भन्दै समयमा नै नियन्त्रण नगरिए परिवारको स्वास्थ्यमा धेरै पैसा र समय सकिने चेतावनी दिए ।

यता होटल पौवाका अध्यक्ष दुर्गा प्रसाद भण्डारीले संस्थागत रुपमा सामाजिक उत्तरदायित्व अन्तर्गत निःशुल्क स्वास्थ्य परीक्षण कार्यक्रम गरेको बताए । होटलका ग्राहकका साथै छरछिमेकीहरुलाई समेत स्वास्थ्य सचेतना र सेवा दिएर अभियानलाई अघि बढाएको बताए । समयमा नै रोग पहिचान गरी ठूलो क्षति रोक्न सकिने हँुदा यस्तो अभियान जरुरी रहेको भन्दै उनले आगामी दिनहरुमा सहकार्य गर्दै जाने बताए ।

करिब २० वर्ष पहिले नेपालमा सर्ने रोगको संख्या ७० प्रतिशत र नसर्ने रोगको संख्या ३० प्रतिशत रहेकोमा यो संख्या बढेर हाल ६० प्रतिशत पुगेको छ ।