खोज

बुटवल, २५ कार्तिक । पछिल्लोसमय बुटवलको खस्किदो व्यापारलाई प्रर्वद्धन गर्ने र आर्थिक गतिबिधिलाई थप चलायमान गराउने उदेश्यका साथ दीपावली महोत्सव गरिएको छ । नेपालीहरुको दोस्रो ठुलो चाड तिहारलाई लक्षित गरि बुटवल उद्योग वाणिज्य संघ रुपन्देहीले बुटवलको मुख्य बजार अमरपथ क्षेत्रमा शनिबारदेखि तीन दिने ‘दीपावली महोत्सव–२०८०’ संचालन गरेको हो ।

एक कार्यक्रमका बिच बुटवल उपमहानगरपालिकाका नगरप्रमुख खेलराज पाण्डेयले उद्घाटन गर्दै बुटवलको विकास सबैको साझा विषय भएको बताए । चलनचल्तीमा रहेको व्यापार व्यवसायलाई आधुनिक परिवेश अनुसार परिमार्जित गरेर अगाडि बढ्न सुझाव दिदै उनले यसमा सबै क्षेत्रको सहकार्यमा आवश्यक रहेको बताए ।

कार्यक्रममा संघका अध्यक्ष हरीप्रसाद अर्यालले बुटवलको खस्किदो व्यापारलाई उठाउन गर्ने गरि आफु संस्थागत रुपमा लाग्ने प्रतिवद्धता जनाए । दीपावली महोत्सव त्यसैको एउटा पाटो भएका भन्दै वर्षभरि नै विविध रचनात्मक कार्यक्रमहरु अघि बढाउने उनले बताए ।
कार्यक्रममा रुपन्देहीका प्रमुख जिल्ला अधिकारी गणेश अर्यालले दीपावली महोत्सव मात्रै नभएर देउसी भैलो लगायतका सांस्कृतिक कार्यक्रमलाई मौलिक बनाउनेतर्फ ध्यान दिनुपर्ने सुझाव दिए ।

कार्यक्रममा संघका पूर्व अध्यक्ष तथा लुम्बिनी प्रादेशिक अस्पताल बुटवलका अध्यक्ष जीवनप्रसाद वझा, नेपाल पत्रकार महासंघ रुपन्देहीका उपाध्यक्ष विश्वास ढकाल, रुपन्देही व्यापार संघका वरिष्ठ उपाध्यक्ष डिल्ली भण्डारी, अमरपथ टोल विकास संस्थाका अध्यक्ष रामबहादुर रणपालले महोत्सवको सफलताको शुभकामना ब्यक्त गरे ।

बुटवल उपमहानगरपालिका संरक्षक र बुटवलका वडा नं. ४, ५ र ६ प्रवद्र्धकको रुपमा रहेको महोत्सव तीन दिनसम्म सञ्चालन मेला महोत्सवका संयोजक तथा बुटवल उद्योग वाणिज्य संघका वरिष्ठ उपाध्यक्ष टंकप्रसाद गैरेले बताए । यो अवधिमा विशेष छुटमा सामानको विक्रि वितरण, नेपाली मौलिक तथा सांस्कृतिक खानाका परिकार र विविध सांस्कृतिक प्रस्तुती समेत रहने उनले बताए ।

बुटवल उद्योग वाणिज्य संघले पहिलो पटक सञ्चालन गरेको दीपावली महोत्सव महेन्द्र पार्क देखि काठेपुलसम्म (अमरपथ लाईन) र नेपालगञ्ज रोडको कार्की मिनीमार्केट देखि ट्राफिकचोकसम्म सञ्चालन गरिएको छ । विभिन्न कलाकारहरुको दैनिक प्रस्तुती रहने संघका महासचिव मुक्ति अधिकारीले बताए ।