खोज

बुटवल, ३ कार्तिक । सामरिक, ऐतिहासिक, धार्मिक महत्व बोकेको बुटवललाई पर्यटकिय गन्त्ब्य बनाउन एकिकृत योजनासहित अघि बढ्नु पर्ने एक कार्यक्रममा बोल्ने बक्ताहरुले जोड दिएका छन । बुटवल आसपासमा रहेका पर्यटकिय स्थलहरुलाई जोड्ने गरि यहाका ब्यवसायिक संस्थाहरु समन्वय र सहकार्यका योजना बनाउनुपर्ने उनिहरुले सुझाव दिए । नेपालको पर्यटन क्षेत्रमा योगदान दिदै आएको पश्चिम नेपाल बस ब्यवसायी प्रालिले शुक्रबार विजयादशमी, शुभ दिपावली तथा छठ पर्वको शुभ अवसरमा शुभकामना आदानप्रदान कार्यक्रममा बोल्ने बक्ताहरुले बुटवललाई पर्यटक गन्तव्यका रुपमा पहिचान गराउने गरि अघि बढ्नुपर्ने बताए ।

कार्यक्रममा बुटवल उपमहानगरपालिकाका नगरप्रमुख खेलराज पाण्डेले यातायात ब्यवसाय कुनै बेला निक्कै गर्वको विषय रहेको भन्दै अहिले त्यो अवस्था नरहेको दुखेसो गरे । बुटवलको विकाससंग यहाका ब्यवसायी संघसंस्थाहरुको योगदानबारे प्रकाश पार्दै उनले फेरी पनि एकिकृत विकासको योजनासहित अघि बढ्न जरुरी रहेको बताए । ‘यातायात ब्यवसायी यहाको विकासको पर्यावबाची हो ।’— उनले भने । बसपार्कलाई नमुना बसपार्क बनाउने लक्ष्यसहित कोसेली घर, क्यान्टिन निर्माण, शौचालय लगायत निर्माणमा स्थानिय सरकार अघि बढेको उनले बताए । बुटवलको पहिचान हुने गरि सबै संघसंस्थाहरु मिलेर सरकारसंग योजना अघि बढाउन उनले आग्रह गरे ।

कार्यक्रममा प्रालिका अध्यक्ष दधिराम खरेलले सडकको दुरावस्थाकै कारण ब्यवसायीहरु पिडामा रहेको भन्दै आम उपभोक्ताको हितको पक्षलाई मध्येनजर गरि सेवा दिदै आएको बताए । हिजोको दिनमा जस्तो लालायित पेशा नरहेपनि आम उपभोक्ताहरुको सुविधालाई मध्येनजर गर्दै संस्थाबाट नै खर्च उपलब्ध गराएर संचालन गर्दै आएको उनले बताए । ‘चाडपर्वको अवसरमा प्रत्येक यातायात ब्यवसायीलाई १० हजार रुपैया दिएर सेवालाई निरन्तरता दिदै आएको छौ ।’—उनले भने । समाजमा देखिएका सबैजसो कमजोरीहरुलाई खोजी गर्दै पत्रकारहरु आलोचनात्मक समाचार निरन्तर दिनुपर्ने उनले सुझाव दिए । यात्रुहरुलाई गन्तव्यसम्म पुर्याएर दशै मनाएमात्र आफुहरु आर्शिवादको योग्य हुने उनले बताए ।

कार्यक्रममा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलका प्रमुख प्रहरी उपरीक्षक (एसपी) कृष्ण प्रसाईले दुर्घटनाका कारण खोजी गरि त्यसलाई रोक्ने अभियान चलाएको बताए । आँखा परिक्षण, मेकानिकल जाँच कार्यलाई जोड दिएको उनले बताउदै सडक जाचभन्दा पनि सुरक्षामा जोड दिएको बताए ।

कार्यक्रममा ईलाका प्रहरी कार्यालय बुटवलमा प्रमुख प्रहरी नायव उपरिक्षक दान बहादुर थापाले आआफ्नो जिम्मेवारीपुर्वक कर्तब्य पुरा गरे दुर्घटना कम हुने र यात्रा सुरक्षित हुने बताए । कार्यक्रममा नेपाल पत्रकार महासंघका अध्यक्ष रामराज पोखरेल, बुटवल उद्योग वाणिज्य संघका अध्यक्ष हरि प्रसाद अर्याल, रुपन्देही उद्योग संघका अध्यक्ष दिलिप सापकोटा, पश्चिम नेपाल बस ब्यवसायी प्रालि संचालक रामचन्द्र भुषालले ब्यवसायिक संघसंस्थाहरुबिच भाईचारा र सहकार्य गर्ने गरि कार्यक्रम गर्दै आएको बताए ।
यसैबिच प्रालिले बुटवल उद्योग वाणिज्य संघ, रुपन्देही उद्योग संघका नवनिर्वाचित पदाधिकारीहरुलाई सम्मान गरेको छ ।