खोज

बर्दघाट, २ कार्तिक।
एसीसी यु–१९ प्रिमियर कप क्रिकेटमा नेपालले साउदी अरव विरुद्धको खेलमा शानदार जित निकालेको छ । मलेशियामा जारी प्रतियोगितामा साउदी अरेवियालाइ ३ सय १ रनको विशाल अन्तरले पाखा लगाउँदै नेपालले जित निकालेको हो । पहिले ब्याटिङ्ग गरेको नेपालले ५० ओभर खेल्दै ८ विकेटको क्षतिमा ३ सय ४८ रनको विशाल स्कोर खडा गरेको थियो ।

नेपालका लागि अर्जुन कुमाल र आकाश त्रिपाठीले २ सय रनको साझेदारी गर्दै नेपालको जित सुनिश्चित गरे । त्रिपाठीले २ छक्का र १७ चौकाको मद्दतमा १ सय ११ बल खेल्दै १ सय ४३ रनको सतकिय पारी खेले, यस्तै कुमालले ९० रनको पारी खेलेका थिए ।

ओपनर ब्याटर दिपक बोहोरा २९ रन बनाउँदै पवेलियन फर्कदा कप्तान देव खनाल भने रन खाता समेत खोल्न नपाइ मोहम्मद रजाको शिकार बने । नेपालको लागि विशाल विक्रम के शीले अविजित २४ रन बनाउँदा दिपक डुम्रेले १४ र दिपेश कँडेलले १३ रन बनाएका थिए ।
साउदीको लागि मोहम्मद रजा, मोहम्मद अहमद र अब्दुल्लाह सिराजले समान २–२ विकेट लिएका थिए यस्तै सजिव मुजिबुर रहेमान र तहा वसिम अमिरले समान १–१ विकेट लिएका थिए ।

३ सय ४९ रनको लक्ष्य पच्छाउदै मैदानमा उत्रिएको साउदीको सुरुवात सुखद हुन सकेन । एकपछि अर्को विकेट पतन भएपछि मात्र १९ दशमलव १ ओभरमा टिम स्कोर ४६ मा सबै विकेट गुम्न पुग्यो ।
उसका लागि बरुन सर्वानन्ले ११ बाहेक अन्य कुनै पनि खेलाडीले दोहोरो अँक समेत जोडन सकेनन् । नेपाली बलर दिपेश कण्डेलको धारीलो बलिङ्गसामु साउदी निरिह जस्तै बन्न पुग्यो । साउदीलाई सस्तैमा धराशायी बनाउने क्रममा नेपालका दिपेश कण्डेलले ६ विकेट लिए । यस्तै आकाश चन्दले २ र सुवास भण्डारीले १ विकेट लिएका थिए ।