© २०२३
२८ भाद्र २०८१, शुक्रबार
२८ भाद्र २०८१, शुक्रबार
गुल्मी, १३ असोज । नेपाल वायुसेवा निगमले गुल्मीमा उडानको तालीकामा परिवर्तन गरेको छ । वायुसेवा निगमले यस अघि साताको दुई पटक मंगलबार र शुक्रबार उडान गर्दै आएकोमा अबदेखि बुधबार र शुक्रबार उडान गर्ने जनाएको छ ।
रेसुङ्गा बिमानस्थलबाट मंगलबारको दिनमा काठमाडौं आवत जावत गर्ने यात्रुहरूको संख्यामा कमी आएपछि वायुसेवा निगमले मंगलबारको तालिकालाई हटाएर बुधबार सारेको रेसुङ्गा विमानस्थलका स्टेशन प्रमुख सुमन थापाले बताए ।
नेपाल वायुसेवा निगमले यस अघि सातको दुईपटक मंगलवबार र बुधवार उडान गर्दै आएकोमा नागरिक उड्ययन प्राधिकरणले बुधबार र शुक्रबार गरि दुई पटक उडान गर्ने अनुमति दिएको छ । यसअघि नेपाल वायुसेवा निगमले मंगलबार रेसुङ्गा बिमानस्थलबाट एक जना मात्र यात्रु लिएर काठमाण्डौ गएको थियो । गुल्मीमा मंगलबारको दिनमा धेरै मानिसहरू घरबाट लामो यात्रामा बाहिर ननिस्कने भएका कारण पनि स्थानीयको मनोभावना अनुसार मंगलबारको ठाउँमा निगमले बुधबार सारेको हो ।
मौसममा खराबी आएको भन्दै यस अघि रेसुङ्गा बिमानस्थलबाट पटक पटक उडान अबरुद्ध हुँदै आएको थियो । उडान भर्न बिमानस्थल पुगेका यात्रुहरू उडान रद्द भएपछि पुनः घर फर्कनु पर्ने बाध्यता थियो । गत असार महिनादेखि नियमित उडान शुरु गरेको वायुसेवा निगमले असोजको पहिलो सातासम्म आईपुग्दा मौसम खराबीका कारण आठ वटा उडान रद्द गर्नु परेको स्टेसन प्रमुख थापाले बताए । असोजको दोश्रो सातापछि गुल्मीमा मौसममा सुधार आएसँगै उडान नियमितता देखिएको छ ।
नेपाल वायुसेवा निगमको १८ सिट क्षमताको जहाजले प्रत्येक हप्ताको बुधबार बिहान ६ : ३० बजे काठमाडौंबाट र बिहान ७ : ३० बजे रेसुङ्गाबाट काठमाडौंका लागि उडान गर्ने गरी समय निर्धारण गरेको छ । काठमाडौंबाट रेसुङ्गाका लागि ७ हजार दुई सय ८० र रेसुङ्गाबाट काठमाडौंका लागि ७ हजार ८० रूपैयाँ भाडा निर्धारण गरेको छ । नेपाल वायुसेवा निगमले टिकट बुकिङ् खुला गरेपछि रेसुङ्गा नगरपालिकाले पनि प्रचार–प्रसार लगायत अन्य अत्यावस्यक कुरामा समन्वय गर्दै आएको रेसुङ्गा नगरपालिका प्रमुख खिलध्वज पन्थीले बताए । नागरिक उड्ययन प्राधिकरणको एयर ट्राफिक कन्ट्रोलर अस्मिता बस्नेतले प्रतिकुल मौसमका कारण यस अघि उडान रद्द हुने गरेको भएपनि अबदेखि मौसममा सुधार आएको भन्दै उडान नियमित हुने बताईन । गुल्मीमा धुले उडान भएको चार वर्षपछि मात्र व्यावसायीक उडान सुरु गरिएको हो । रेसुङ्गा बिमानस्थल सदरमुकाम तम्घासबाट ५ किलोमिटरको दुरीमा पर्दछ ।
© २०२३
सर्वाधिकार सुरक्षित
Design & Developed By:
