खोज

बुटवल, १२ असोज । विश्व मुटु दिवसको अवसरमा बुटवलमा वृहत सचेतामुलक साईकल रयाली गरिएको छ । नेपाल हृदय रोग निवारण प्रतिष्ठान रुपन्देही शाखाको आयोजना तथा बुटवल उपमहानगरपालिकाको आर्थिक सहयोगमा सचेतनामुलक साईकल रयाली गरिएको हो ।

कार्यक्रमको शुभारम्भ गर्दै बुटवल उपमहानगरपालिकाका नगरप्रमुख खेलराज पाण्डेयले विश्व मुटु दिवसको अवसरमा साईकल चलाएर मानव स्वस्थ्यसंगै नगरका पर्यटकिय स्थलको प्रचारमा योगदान पुग्ने बताए । विश्वमा नै सरुवारोगी भन्दा दिर्घरोगीहरुको संख्या बढ्दो देखिएको भन्दै दैनिक कार्यालयमा सहयोगका लागि आउने नगरबासीको संख्या अत्याधिक रहेको बताए । यसबाट परिवार, समाज र देशलाई नै ठुलो धक्का पुगेको उनले बताए । रोगबारे सचेत बनाउन जरुरी रहेको भन्दै यसमा सबै संघसंस्थाहरु लाग्नुपर्ने सुझाव दिए । प्रतिष्ठानबाट गरिने कार्यक्रमलाई प्रभावकारी बनाउन मुटु रोगबाट न्युनिकरणको बारेमा समेत थप सचेतना र स्वस्थ्य शिविर चलाउने विषयमा ध्यान दिनुपर्ने बताए । मानव स्वस्थ्यको लागि साईकल चलाउनु लाभदायक भएको भन्दै साईकलमैत्री पुर्वाधारमा आफुले जोड दिएको बताए । राजमार्गदेखि चिडियाखोलासम्मको सडकमा साईकल लेन बनाउन आवश्यक पहल गरिएको उनले बताए । मुल र भित्री सडकहरुमा समेत पैदल र साईकलयात्रीहरुलाई सुरक्षित खालका सडक बनाउने विषयमा सडक विभागलाई सुझाव दिएको उनले बताए ।

यसैबिच बुटवल उपमहानगरपालिकाका नगरप्रमुख खेलराज पाण्डेय, नेपाल हृदय रोग निवारण प्रतिष्ठानका रुपन्देही शाखाका अध्यक्ष बोनिन पिया, प्रतिष्ठानका निवर्तमान अध्यक्ष निर्मल लाकौल, वरिष्ठ उपाध्यक्ष काजिमान श्रेष्ठ, उपाध्यक्ष नरेश श्रेष्ठ, कोषाध्यक्ष उमाशंकर मालपानी, सहसचिव करण खनाल, सन्जय मुडभरी, कार्यक्रमका संयोजक अभिषेक भारी, बुटवल युनाईटेड साईक्लिङ क्लबका अध्यक्ष उत्तम श्रेष्ठ, बुटवल साईक्लिङ ग्रुप शिव चौधरीले मृगौला रोगको उपचार गराईरहेका बुद्घनगरका ३३ वर्षिय गोपाल गहतराजका माता बिन्दु सुनारलाई नगद ११ हजार रुपैया सहयोग हस्तान्तरण गरेका छन ।

कार्यक्रममा नेपाल हृदय रोग निवारण प्रतिष्ठानका रुपन्देही शाखाका अध्यक्ष बोनिन पियाले यो वर्ष मुटु दिवसको अवसरमा रचनात्मक र प्रभावकारी हुने गरि साईकल रयाली गरिएको बताए । स्वस्थ्य रहन ब्यायामको महत्व प्रकाश पार्दै साईक्लिङ एउटा महत्वपूर्ण माध्यम भएको बताए । सचेतना कार्यक्रमसंगै दीर्घरोगीलाई आर्थिक सहयोग जस्तो नमुना काम गर्न सफल भएको उनले बताए ।

कार्यक्रममा सहभागी बुटवल युनाईटेड साईक्लिङ क्लब, साइकल सिटी बुटवल, बुटवल साईक्लिङ ग्रुप, तिनाउ साईक्लिङ क्लब, नवलपरासी साईक्लिङ संघका साइक्लिस्टहरुले ‘मन लगाउ, मुटु बचाउ, मन लगाउ, बाथ—मुटुरोगबाट बचाउ, मन लगाउ, हृदयघातबाट बचाउ, मन लगाउ, पत्रु खानाबाट मुटुलाई बचाउ ।’ भन्ने प्लेकार्ड सहित बुटवल नगर परिक्रममा गरेका थिए । यसैबिच दिवसको अवसरमा रुपन्देहीका १० वटा विद्यालयहरुमा सचेतनामुलक पर्चापम्पेलटिङ वितरणको कार्यक्रम समेत गरिएको प्रतिष्ठानका सचिव राजेन्द्र काकीले बताए ।