खोज

बुटवल, ११ असोज। प्रथम केपी ओली कप राष्ट्रिय टि—२० क्रिकेट प्रतियोगिता पोखरामा मंसिरको पहिलो सातामा हुने भएको छ । मदन भण्डारी स्पोर्टस एकेडेमीको आयोजनामा मंसिर ७ देखि १६ गतेसम्म पोखरामा हुने प्रथम केपी ओली कप राष्ट्रिय टि–२० क्रिकेट प्रतियोगिताको विहिबार पत्रकार सम्मेलन गरि जानकारी दिए ।

कार्यक्रममा एकेडेमीका केन्द्रिय अध्यक्ष ध्रुव आचार्यले प्रतियोगितामा सात प्रदेश, तिन विभागिय टिम नेपाल पुलिस, नेपाल आर्मी, एपिएफ क्लव र एकेडेमीका यू–१९ का दुई गरि १२ टिमले प्रतिस्पर्धा गर्ने बताए । प्रतियोगिताको उपाधि विजेताले नगद ५ लाख रुपैया, कप, मेडल, प्रमाणपत्र र उपविजेता टिमले २ लाख ५० हजार रुपैया, कप, मेडल, प्रमाणपत्रबाट पुरस्कृत हुने छन । यसैगरि विधागत उत्कृष्ट खेलाडीहरुलाई समेत पुरस्कृत गरिने उनले बताए । म्यान अफ द सिरिजले नगद रु ३० हजार रूपैयाँ, उत्कृष्ट बलरले नगद रु २० हजार रूपैयाँ र म्यान अफ द म्याचले नगद रु ५ हजार रूपैयाँ नगद प्राप्त गर्नेछन् । आइसिसीको नियम अनुसार खेलाइने खेल सम्पन्न गर्नको लागि करिब ७७ लाख खर्च लाग्ने अनुमान गरिएको उनले बताए । ‘सबैका लागि खेलकुद’ भन्ने मुल नाराका साथ २०६६ साल पुस १७ गते जननेता मदन भण्डारीको नाममा स्थापना भएको एकेडेमीले मुलुकको खेलकुद विकासका लागि महत्वपूर्ण भूमिका निर्वाह गरिरहेको उल्लेख गर्दै अध्यक्ष आचार्यले युवालाई खेलकुदमा जोडेर व्यवसायिक खेलाडी उत्पादनको लक्ष्य रहेको बताए ।

कार्यक्रममा पूर्व राष्ट्रिय क्रिकेटर तथा एकेडेमीका क्रिकेट विभाग प्रमुख शक्ति गौचनले एकेडेमीका संरक्षक तथा पूर्व प्रधानमन्त्री केपी ओलीको नामबाट खेलाईने प्रतियोगिताबाट क्रिकेट खेलको विकास र युवा खेलाडीहरुलाई हौसला मिल्ने दाबी गरे । ट्यालेन्ट हन्टबाट छनौट गरि एकेडेमीको २ टिम तयार गरिएको उनले बताए । पुर्वाधारको निमार्ण नेपाली क्रिकेटको आवश्यकता भएको भन्दै उनले खेल पर्यटन अबको सम्भावना भएको दाबी गरे ।

सो अवसरमा गण्डकी प्रदेश सभाका पूवं सांसद एवं एकेडेमीका सल्लाहकार मोहन रेग्मीले टि–२० राष्ट्रिय प्रतियोगिता खेलाडी उत्पादनसंगै खेलकुद विकासका लागि महत्वपूर्ण प्रतियोगिता भएको बताए । खेलकुदको विकासमा ग्रास रुटको महत्वप्रकाश पार्दै खेलकुदबाट नै अनुशाशित, राष्ट्रप्रेमी, मेहनती र प्रतिस्प्रर्धी नागरिक उत्पादन गर्न सकिने बताए ।

कार्यक्रममा एकेडेमीका उपाध्यक्ष एवं गण्डकी प्रदेश इञ्चार्ज राजेश कुमार गुरुङले पर्यटकीय नगरी पोखरामा आयोजना हुने प्रतियोगिताबाट खेल पर्यटनको सम्भावनाको ढोका खोलेको बताए ।