खोज

बुटवल,८ असोज । नेपाली कांग्रेस लुम्बिनीे अधिवेशनमा प्रदेश सभापति र सदस्य पदमा हारेका क्रमशः भरत शाह र गंगा शाही सहित ५ जनालाई केन्द्रीय सदस्यमा मनोनित गर्ने निर्णय पार्टीको विधान विपरित रहेको भन्दै विरोध र असन्तुष्टी शुरु भएको छ । नेपाली कांग्रेसको विधानको दफा ५९ ले पार्टीको कुनै तहको अधिवेशनमा उम्मेदवार भई पराजित भएको व्यक्ति सोही अधिवेशनको अवधिमा सोभन्दा माथिल्लो वा तल्लो तहको कुनै पनि पदमा उम्मेदवार हुन नपाउने व्यवस्था छ । तर विधानको यसै धारालाई सभापति शेरबहादुर देउवाले उल्लंघन गरेर केन्द्रीय सदस्य मनोनीत गरेको भन्दै कांग्रेसमा असन्तुष्टि बढेको छ । गत महाधिवेशनमा तल्लो तहमा पराजित भरत शाह, अर्जुनप्रसाद जोशी, किरणराज शर्मा पौडेल, लक्ष्मी खतिवडा र गंगा शाहीलाई केन्द्रीय सदस्यमा मनोनित गर्नु विधान विपरित भएको कांग्रेस लुम्बिनीका प्रदेश सभापति अमरसिंह पुनले बताए । शाहलाई पुनले सभापतिमा हराएका थिए । पांचै जना संस्थापन पक्षका हुन् ।
सभापति देउवाले ४ असोजमा जोशी, शाह, पौडेलसहित आठ जनालाई केन्द्रीय समितिमा मनोनित गरेका थिए । जोशी गण्डकी प्रदेशमा र शाह लुम्बिनीमा प्रदेशमा सभापतिमा पराजित भएका थिए । पौडेल बागलुङमा महाधिवेशन प्रतिनिधिमा पराजित भएका थिए ।

खतिवडा र शाही सहित १० जनालाई सभापति देउवाले २०७९ साउन ३१ मा केन्द्रीय सदस्यमा मनोनित गरेका थिए । खतिवडा सुनसरी १ को क्षेत्रीय सभापतिमा र शाही लुम्बिनी प्रदेश समितिको सदस्यमा पराजित व्यक्ति हुन् ।

कांग्रेसको विधान अनुसार प्रमुख प्रतिस्पर्धी बनेर पराजित उम्मेदवार व्यक्ति उक्त समितिको स्वतः सदस्य बन्ने व्यवस्था छ । कांग्रेसको विधानको धारा ६५ अनुसार पार्टीको सबै तहको कार्यसमितिको सभापति पदको निर्वाचनमा निर्वाचित सभापतिपछि दोस्रो बढी मत प्राप्त गर्ने व्यक्ति सम्बन्धित कार्यसमितिको सदस्य हुने उल्लेख छ ।

निकततम प्रतिद्वन्द्वी स्वतः उक्त कार्यसमितिको सदस्य हुने व्यवस्थालाई सभापतिले कुल्चिएको लुम्बिनीका प्रदेश सभापति पुनले बताए ।