खोज

बुटवल, १० भदौ । स्नुकर खेलको अन्तराष्ट्रिय खेलाडी रेगन श्रेष्ठ बुटवलका हुन । विश्व स्नुकर च्याम्पियनसिपमा अन्तिम १६ सम्म पुग्न सफल भएर ईतिहास रचे । उनि नेपालको स्नुकर खेलको एक नम्बर रेकिङका खेलाडी हुन । उनिजस्तै रुपन्देही र लुम्बिनी प्रदेशबाट दजनौ खेलाडीहरु राष्ट्रिय प्रतियोगिता खेलेका छन । यति धेरै खेलाडी उत्पादन भएको क्षेत्रमा सरकारबाट भने खासै चासो दिएको पाउदैनौ । खेलाडी र खेलप्रेमीहरुको सहयोगमा सातौ रुपन्देही जिल्ला स्तरीय स्नुकर प्रतियोगिता २०८० तयारी भैरहेको छ ।

युवा खेलाडीलाई प्रोत्साहन गर्ने उदेश्यका साथ रुपन्देही पुल तथा स्नुकर संघको आयोजनामा भदौ २२ गतेबाट शुरु हुने प्रतियोगिताको खेलाडी दर्ता, खेल स्थलको तयारी लगायत सबै पूरा भएको संघका अध्यक्ष सुजन पुनले बताए । बेरोजगार र कुलतमा फसेका युवाहरुको थलोको रुपमा यो खेललाई चिनिने गरेको बेला पछिल्लोसमय भने यसको परिचय फेरिएको उनले बताए । स्थानियस्तरमा खेलाडी, खेलप्रेमीहरु निरन्तर लागेर अहिलेको स्थानमा पुगेको उनले बताए । बुटवलबाट रेगन श्रेष्ठ जस्ता अन्तराष्ट्रिय खेलाडी उत्पादन गर्न सफल भएको उनले बताए । ‘श्रेष्ठले अन्तरास्ट्रिय पहिचान बनाउन सफल भएको छ ।’—उनले भने । नेपालको रेकिङमा नम्बर एक खेलाडी बुटवलकै रहेको उनले बताए । सरकारबाट नै आवश्यक पुर्वाधार र खेलकुद सामग्री उपलब्ध गराउन सके युवा खेलाडी उत्पादनमा थप प्रोत्साहन मिल्ने उनले बताए । राष्ट्रिय खेलकुद परिषदले मान्यता दिएको यो खेल सातौ, आठौ र नवौ प्रतियोगितामा भने सहभागी नगराएको उनले दुखेसो गरे ।

प्रतियोगिताको उपाधि विजेताले नगद ५० हजार रुपैया, ट्रफि, प्रमाणपत्र, उपविजेताले नगद २५ हजार रुपैया, ट्रफि, प्रमाणपत्रबाट पुरस्कृत गरिने छ । यसैगरि हाई स्कोररलाई नगद १० हजार रुपैया, ट्रफि, प्रमाणपत्र, उदयमान खेलाडी, अनुशासित खेलाडीलाई नगद ५ हजार रुपैया, ट्रफि, प्रमाणपत्रबाट पुरस्कृत गरिने छ । यसैगरि पुर्ण स्कोर १४७ लाई नगद १ लाख रुपैया, ट्रफि, प्रमाणपत्रबाट पुरस्कृत गरिने छ ।
कार्यक्रममा संघका कोषाध्यक्ष अमिन थापाले कुल ५ लाख रुपैया खर्च हुने प्रतियोगितामा खेलप्रेमीहरुको सहयोग मिलेको बताए । प्रतियोगिताको छैटौ संस्करणको विजेता भैरहवा कसिस कोईराला रहेका थिए ।

कार्यक्रममा बुटवल उपमहानगरपालिकाका प्रवक्ता तथा संघका सल्लाहकार शिव राना, संघका वरिष्ठ सल्लाहकार संजयरत्न बज्राचार्य, सल्लाहकार शिशिर गुरुङ, स्नुकरको पाल्पा च्याम्पियन कुनल श्रेष्ठ, महासचिव शंकर खड्काले स्थानिय खेलाडीहरुलाई प्लेटफर्म दिने गरि स्थानीयस्तरमा प्रतियोगिताहरुका साथै राष्ट्रिय प्रतियोगिता महत्वपूर्ण हुने बताए ।

कार्यक्रममा संघका प्रथम उपाध्यक्ष बासु प्रधानले स्नुकर अनुसासित खेल भएको बताए । शारीरिक र मानसिक दुबै ब्यायाम हुने स्नुकर खेलप्रति समुदायमा रहेको गलत दृष्टिकोण फेरिएको भन्दै नेपालमा विकासकै क्रममा रहेको बताए । प्रतियोगितामा १ सय ५० जना खेलाडीहरु प्रतिस्पर्धा गर्ने छन । रुपन्देहीमा ४४ वटा क्लब र १ हजार खेलाडी रहेका छन । प्रतियोगिताको मिडिया पार्टनर न्युज बुटवलटुडे डटकम रहेको छ ।

भिडियो सामग्री