खोज

बुटवल, ९ भदौ । मार्शल आर्ट खेलप्रति बालबालिकाहरुलाई आकर्षित गर्दै खेल गतिविधिमा जोड्ने उदेश्यका साथ युवा खेलाडीहरुलाई निशुल्क ड्रेस वितरण गरिएको छ । बुटवल उपमहानगरपालिकाको सामुदायिक विद्यालयमा अध्ययनसंगै तेक्वान्दो सिक्ने प्रशिक्षार्थीहरुलाई आरके तेक्वान्दो एकेडेमीले निशुल्क ड्रेस वितरण गरिएको हो ।

एक कार्यक्रमका बिच बुटवल उपमहानगरपालिकाका नगरप्रमुख खेलराज पाण्डेय, वडा नं ५ का वडाअध्यक्ष हरि प्रसाद श्रेष्ठ, वडा नं ३ का वडा अध्यक्ष बिष्णु ढकाल, वडा सदस्य हरिनारायण मिश्र, दुर्गा मन्दिर ब्यवस्थापन समितिका उपाध्यक्ष हरिकृष्ण प्रधान, दिपक खत्रीले खेलाडीहरुलाई ड्रेस हस्तान्तरण गरे । कार्यक्रममा नगरप्रमुख पाण्डेयले मानव स्वस्थसंग खेल जोडिएको भन्दै खेल विकासमा स्थानिय सरकारबाट महत्वपूर्ण योगदान दिदै आएको बताए । खेलकुदको क्षेत्रमा स्थानिय पालिकाबाट लगानी गरेको दाबी गरे। पुर्वाधार विकाससंगै नगरस्तरिय विद्यालयमा फुटबल, मार्शल आर्ट, भलिबल लगायत गतिविधिको लागि बजेट बिनियोजन गरिएको उनले बताए । खेलमा आवद्ध युवाहरु कुलतमा नफस्ने र अनुशासन हुने हुदा पनि यसमा गरिएको लगानी ब्यर्थ नहुने उनले दाबी गरे । खेलबाट बुटवलको गरिमा र पहिचान हुने उनले बताए ।

कार्यक्रममा आरके तेक्वान्दो एकेडेमीका अध्यक्ष राजकुमार पाण्डेले जेहन्दार खेलाडीहरुलाई निशुल्क तेक्वान्दो खेलसंगै ड्रेस वितरण गरिएको बताए । कर्णालीमा हुने दशौ राष्ट्रिय प्रतियोगिता लक्षित गरि प्रशिक्षण गराउदै आएको उनले बताए । एकेडेमीका ब्ल्याक बेल्ट खेलाडीहरुबाट सहयोग जुटाएर ड्रेस वितरण गरिएको उनले बताए ।

कार्यक्रममा वडा नं ५ का वडाअध्यक्ष हरि प्रसाद श्रेष्ठले रुपन्देही खेलकुदको हबका रुपमा रहेको दाबी गरे। कुनै बेला यो मार्शल आर्ट, क्रिकेट, बक्सिङमा राष्ट्रिय र अन्तराष्ट्रिय पदक जिताउन सफल भएको भन्दै पछिल्लोसमय सुस्ताएको खेललाई जगाउने गरि लाग्ने उचित समय भएको बताए । खेल स्थानमा विद्युत जडान र सरसफाईमा वडाबाट आवश्यक पहल गर्ने उनले प्रतिवद्घता जनाए । खेलकुदलाई पर्यटनसंग जोड्ने गरि छिमेकी देशहरुका खेलाडी भित्राउने गरि प्रतियोगिताहरु आयोजना गर्न समेत सुझाव दिए ।

कार्यक्रममा वडा नं ३ का वडा अध्यक्ष बिष्णु ढकालले तेक्वान्दो खेल विकासको भावनासहित आरके तेक्वान्दो एकेडेमी र प्रशिक्षक राजकुमार पाण्डेको योगदानबारे चर्चा गरे । वडा कार्यालयबाट आफुले खेल गतिविधिमा अग्रसर ब्यक्ति, संस्थाहरुलाई गच्छ अनुसार सहयोग गर्दै आएको उनले बताए। यसवर्ष ५० हजार रुपैया बराबर खेलकुद सामग्री सहयोग गरेको उनले बताए । हाटबजार स्थित बालमन्दिरमा ३ सय बढि खेलाडीहरु प्रशिक्षण लिईरहेका छन ।