खोज

लुम्बिनी, ६ भदौ ।

संविधानसभा सदस्य एवं लुम्बिनी विकास कोषका उपाध्यक्ष प्रथम योल्मो खेन्पो (छिमे छिरिङ) डा.ल्हारक्याल लामाले लुम्बिनीको विकासको निम्ति आफू लुम्बिनी आएको बताएका छन् ।

लुम्बिनी बुद्ध धर्म संरक्षण समितिले बुधबार आयोजना गरेको बधाई तथा शुभकामना कार्यक्रममा संविधानसभा सदस्य तथा पूर्व राज्यमन्त्री समेत रहेका डा. लामाले आफू लुम्बिनीको विकास गर्ने गरी आएको बताएका हुन् । विश्वभरका सवा अर्व बौद्धमार्गीहरूको सबैभन्दा ठूलो पवित्र तीर्थस्थलको रूपमा प्रख्यात लुम्बिनीको धार्मिक, सांस्कृतिक, ऐतिहासिक तथा पुरातात्विक महत्वका दृष्टिले विश्व जगतको आकर्षणको केन्द्रको रुपमा रहेको भन्दै यसको विकास र संरक्षण गर्नु आफ्नो मूल दायित्व रहेको बताए ।

उपाध्यक्ष डा.लामाले लुम्बिनीमा रहेको बत्तीको समस्या, भित्र सडक मार्ग र भ्रमण गर्ने महत्वपूर्ण स्थानहरुमा शौचालयको व्यवस्था र वस्तुभाउ लुम्बिनी परिसर भित्र आएर फोहोर गरेको समस्या भएकाले तत्काल उक्त समस्याहरुको हल गर्ने समेत प्रतिबद्धता व्यक्त गरे । कार्यक्रममा लुम्बिनी बुद्ध धर्म संरक्षण समितिका अध्यक्ष मैत्री महास्थविर, सचिव भिक्षु सिरी वजिरले समग्र विहार तथा गुम्बाहरुको समस्याबारे ध्यानाकर्षण गराएका थिए ।