खोज

काठमाडौं,५ भदौ । नेकपा एकीकृत समाजवादीका अध्यक्ष माधवकुमार नेपालले राष्ट्रिय स्वतन्त्र पार्टी लगायतका दललाई मध्यमवर्गीय भुइँफुट्टाको आरोप लगाएका छन् । पार्टीको केन्द्रीय कमिटीको बैठकमा प्रस्तुत गरेको प्रतिवेदनमा नेता नेपालले गत निर्वाचनबाट उदाएका राष्ट्रिय स्वतन्त्र पार्टी, राप्रपा र स्वतन्त्र उम्मेदवारहरूप्रति लक्षित गर्दै आफ्नो प्रतिवेदनमा यस्तो आरोप लगाएका हुन् । इतिहास र सिद्धान्तभन्दा अलग भएकाले पपुलिस्ट हुन खोज्दा युवा मत प्रभावित भएको नेपालले दाबी गरेका छन् ।

‘राजनीतिलाई इतिहास र सिद्धान्तभन्दा अलग केवल क्षणिक लोकरञ्जना पपुलिज्मका रूपमा बुझ्ने केही मध्यमवर्गीय भुइँफुट्टाहरूका आवेगले मुलुकको युवा जनमतलाई प्रभावित पारेको छ । सस्तो निन्दा भत्र्सनाको असहिष्णु प्रतिक्रियाले सामाजिक सम्वादको रूप लिँदैछ,’ नेपालले नयाँ दलप्रति संकेत गर्दै भनेका छन्, तर यसको अर्को पाटो पनि छ । नयाँ भविष्यको स्पष्ट मार्गचित्रका साथ एउटा सङ्गठित शक्ति अगाडि आउँदा त्यही तीव्रताका साथ समाजमा क्रान्तिकारी तथा प्रगतिशील ध्रुवीकरणको सम्भावना पनि उत्तिकै छ । हाम्रो पार्टी नै त्यो शक्ति बन्नु पर्दछ ।’

देशको असाधारण सम्भावनामाथि तुषारापात हुँदा जनतामा निराशा छाएको र बौद्धिक जगत पनि प्र्रभावित भएको नेपालको भनाइ छ ।

नेपालले आरोप लगाएको रवि लामिछानेको रास्वपाले २१ र राप्रपाले १४ सिट जितेका थिए । तर एमालेबाट विभाजन भइ बनेको नेपाल नेत्तृत्वको नेकपा एसले कांग्रेस र माओवादीसँग गठबन्धन गर्दा पनि १० सिट मात्रै जितेको थियो । न्यूनतम भोट ल्याउन नसक्दा नेकपा एस राष्ट्रिय पार्टी बन्न पनि चुकेको थियो ।