खोज

चन्द्रौटा (कपिलवस्तु), २९ साउन ।

नेपाल कम्युनिस्ट पार्टी (माओवादी केन्द्र) का उपाध्यक्ष तथा पूर्व सभामुख कृष्ण बहादुर महराले पार्टीको एजेण्डा बोकेर सबै नेता तथा कार्यकर्ताहरू घरदैलो अभियानमा लाग्न आग्रह गरेका छन् ।

माओवादी केन्द्रले सुरु गरेको तीन महिने अभियान सफल बनाउन उनले आम नागरिकको घरघरमा पुग्न आफ्ना नेता तथा कार्यकर्ताहरूलाई निर्देशन दिएका हुन् । कपिलवस्तुको शिवराज नगरपालिका चन्द्रौटास्थित मदरसाको सभाहलमा कार्यकर्तासँग भेट गर्दै महराले पार्टीको सन्देशलाई आम जनतासामु लैजानुपर्ने बताए ।

माओवादी केन्द्रका स्थायी कमिटी सदस्य एवं लुम्बिनी प्रदेश पूर्व मुख्यमन्त्री कुलप्रसाद केसीले पार्टीको सकारात्मक सन्देश आम नागरिकसामु पु¥याउने अभियानमा जुट्न अपिल गरे । कार्यक्रमा माओवादी केन्द्र लुम्बिनी प्रदेश इन्चार्ज हितमान शाक्यले पार्टी र आम नागरिकबीचको सम्बन्ध सुधार्न तीन महिने अभियान सुरूवात गरिएको बताए । प्रदेश इन्चार्ज शाक्यले जनताको मन जित्न नेता र कार्यकर्ताहरू घरदैलो अभियानमा सक्रिय भई लाग्न निर्देशन दिए ।

मदरसा बोर्ड लुम्बिनी प्रदेश उपाध्यक्ष मौलाना मशहुद खाँ ’नेपाली’ ले अल्पसंख्यक मुस्लिम समुदाय राज्यको सेवासुविधाबाट बन्चित भएको दुखेसो पोखे । साढे १३ सय धार्मिक विद्यालयमा अध्यापन गराउने धर्मगुरूलाई नयाँ शिक्षा ऐनले उपेक्षा गर्नु दुःखदायी रहेको उनले औंल्याए । आफ्नै पार्टीको सरकारले पनि मुस्लिम समुदायलाई समेट्न नसकेको उनले गुनासो गरे ।

भेटघाट कार्यक्रममा शिवराज नगरपालिका वडा नं. ७ का वडाध्यक्ष एवं पार्टी नेता अनुप कुमार चौधरीले जिल्लाका उखु कृषकहरूको समस्यालाई राज्यले सम्बोधन गर्न नसकेको गुनासो गरे । उखु किसानको समस्या लिएर काठमाडौंमा गई आन्दोलन गर्दा समेत आफ्नै पार्टीबाट साथ नपाउँदा जनविश्वास घट्दै गएको औल्याए ।