खोज

चन्द्रौटा (कपिलवस्तु), २८ साउन । कपिलवस्तुको शिवराज नगरपालिकाका शिक्षकहरु आन्दोलनमा उत्रिएका छन् । शिक्षा ऐनका विभिन्न बुँदा तथा प्रावधान विरुद्ध उनीहरु आन्दोलनमा उत्रिएका हुन् । सरकारद्वारा प्रस्तावित विद्यालय ऐनविरुद्ध नेपाल शिक्षक महासंघले आइतबारदेखि देशैभरि शिक्षा ऐन र व्यवस्थाको विरोधमा आन्दोलनका कार्यक्रम गरिएको नेपाल शिक्षक महासंघ शिवराज नगर कमिटीले जनाएको छ ।

नेपाल शिक्षक महासंघ शिवराज नगर कमिटीका संयोजक मुक्तिनाथ पोख्रलले आइतबारदेखि पहिलो चरणको आन्दोलन धर्ना दिएर सुरु गरिएको बताए । महासंघले पहिलो चरणमा स्थानीय तहमा पुगेर दबाबमूलक कार्यक्रम गरिएको उनले जनाए । शिक्षक महासंघको केन्द्रीय निर्णय अनुसार कपिलवस्तु जिल्लाको १० ओटै पालिकाहरुमा आन्दोलनका कार्यक्रमहरु गरेको बताए । सरकारले समयमै शिक्षकहरूको माग सम्बोधन नगरे अनिश्चितकालिन रुपमा विद्यालय बन्द गर्ने तथा थप अन्दोलनका कार्यक्रम गर्ने चेतावनी समेत दिएको संयोजक पोख्रलको भनाई छ ।

उनका अनुसार स्थानीय तहका कार्यालय अगाडी सम्बन्धित शिक्षक–कर्मचारीहरुको उपस्थितमा ३ घण्टा धर्ना बसेका थिए । धर्नाको समापनसँगै मागहरुको सहमतिका छाँयाप्रतिसहित केन्द्रबाट पठाइएको जानकारी पत्रसमेत स्थानीय तह समक्ष पेश गरिएको छ । पालिकालाई शिक्षकहरुको माग सम्बोधन गर्न ज्ञापन पत्रसमेत बुझाएको छ । शिक्षकहरुको माग सम्बोधन सम्बन्धित निकायसँग समन्वय गर्ने नगरपालिकाले जनाएको छ ।