खोज

काठमाडौँ, २३ साउन ।

नेकपा एमालेले फेरि अवरोध गरेपछि आजको संसद बैठक स्थगित भएको छ ।

उपप्रधान तथा गृहमन्त्री नारायणकाजी श्रेष्ठको जवाफमा चित्त नबुझाएर एमालेले संसद अवरोध गरेपछि बैठक स्थगित भएको हो । बैठक अब भोलि दिउँसो १ बजे बस्नेछ । प्रमुख प्रतिपक्षी नेकपा एमाले उपप्रधान तथा गृहमन्त्री नारायणकाजी श्रेष्ठले ललिता निवास र सुन तस्करी प्रकरणलाई लिएर दिएको जवाफमा आपत्ति जनाएको छ।

उपप्रधानमन्त्री श्रेष्ठले एमालेले संसद् अवरोध गरेका कारण आफूले आएर जवाफ दिन नपाएको आशय व्यक्त गरेपछि एमालेले आपत्ति प्रकट गरेको हो।

यसबीचमा माओवादी केन्द्रको केन्द्रीय समिति बैठक चलेको स्मरण गराउँदै एमाले सचेतक महेश बर्तौलाले गृहमन्त्रीले आफूहरुलाई दोष दिएर उम्किन नपाउने बताए।

साउन ३ गते बरामद भएको १०० केजी सुनबारे गृहमन्त्री र अर्थमन्त्रीलाई थाहा नभई प्रधानमन्त्रीलाई मात्रै थाहा भएको विषय नै शंकास्पद रहेको उनले बताए।

सुन तस्करी प्रकरणको अनुसन्धानको दायरमा गृहमन्त्री श्रेष्ठ र अर्थमन्त्री डा. प्रकाशशरण महतलाई पनि ल्याउनुपर्ने बताउँदै बर्तौलाले त्यसकै लागि उच्चस्तरीय समिति चाहिएको बताए।

उनले उच्चस्तरीय छानबिन समितिको माग यथावत रहेको बताउँदै सरकारले तस्करलाई संरक्षण गरिरहेको पनि उल्लेख गरे।