खोज

काठमाण्डौ, २३ साउन ।  काठमाण्डौमा जारी एसियाली फुटबल महासंघ (एएफसी) को दोस्रो स्तरको क्लब फुटबल प्रतियोगिताको पहिलो चरणको खेलमा नेपालको मछिन्द्र एफसीले भुटानको पारो एफसीमाथि ३—२ को जित निकालेको छ ।

दशरथ रंगशालामा मंगलबार भएको खेलको छैटौ मिनेटमा मछिन्द्रका गोलकिपर बिशाल श्रेष्ठको आत्मघाती गोलमार्फत पारोले खेलमा अग्रता लिएको थियो । तर यो अग्रता धेरै बेर टिक्न सकेन । खेलको ११ औ मिनेटमा बिमलले हेडमार्फत बाराबरी गोल गरे । आयुष घलानको पासलाई उनले उत्कृष्ट हेडर गरे । बिमलले आर्कषक पासमा आयुषले खेलको १४ औ मिनेटमा दोस्रो गोल गोल गरे । खेलको ३८ औ मिनेटमा ओलावाला अफिजको हेडरमार्फत गोल गर्दै अग्रता बढाए । पारोका इभान असान्टेले खेलको ७१ औ मिनेटमा गोल गर्दै अन्तर कम गरे । पारोका धेरै अवसरलाई मछिन्द्रका डिफेन्डरले रोके । खेलमा पाराबाट भएका एक दर्जन बढी प्रहारलाई बिशालले उत्कृष्ट बचाउ गरे ।

नेपाल दोस्रो चरणको प्लेअफमा एक सातापछि (१६ अगस्ट) भारतको मोहन बगानसँग खेल्नेछ । दोस्रो चरणको दुई विजेताबीच (२२ अगस्ट) प्लेअफ हुनेछ । प्लेअफ विजेता एएफसी कपको दक्षिण एसियाको समूह चरणमा पुग्नेछ । दक्षिण एसियाको समूह चरणमा यसअघि नै भारतको ओडिसा, बंगलादेशको बशुन्धरा किंग्स र माल्दिभ्सको माजिया पुगिसकेका छन् । नेपालको लिग च्याम्पियन भएको चर्च ब्वाइज क्लबसँग एएफसी क्लब लाइसेन्स नहुदा यसको फाईदा गत सिजनको उपविजेता मछिन्द्र फुटबल क्लबले एफसी कपमा अवसर पाएको हो ।