खोज

चन्द्रौटा(कपिलवस्तु), २० साउन ।

कपिलवस्तुको एक नमुना विद्यालयमा शिक्षकलाई ल्यापटप प्रदान गरिएको छ । विजयनगर गाउँपालिकाको दूधाधारी नमुना माध्यमिक विद्यालय गुगौलीका ९ जना शिक्षकलाई एक कार्यक्रमकाबीच शुक्रबार ल्यापटप प्रदान गरिएको हो ।

विद्यालय व्यवस्थापन समिति तथा शिक्षक कर्मचारीको बैठकको अवसरमा शिक्षकलाई ल्यापटप प्रदान गरिएको व्यवस्थापन समितिका अध्यक्ष राम प्रघट कोरीले बताए । उनका अनुसार गाउँपालिका वडा नम्बर–१, गुगौलीमा अवस्थित नमुना माविका आधारभूत तह र माध्यमिक तहमा अध्यापन गराउने शिक्षकलाई ल्यापटप प्रदान गरिएको छ ।

विद्यालयले ५ ओटा स्मार्ट बोर्डसहित प्रोजेक्टरको व्यवस्थापनसमेत गरेको छ । शिक्षकले प्रविधिक क्रियाकलापबाट शैक्षिक स्तरलाई थप प्रभावकारी बनाउन स्मार्ट बोर्ड र प्रोजेक्टर जडान गरिएको जनाइएको छ । यस्तै विद्यालायका प्रधानाध्यापक सुग्रिव प्रसाद कोरीले शिक्षकलाई आवश्यक सामग्री, तथ्यांक संकलन गरि अध्ययनपनमा सहज हुने बताए ।

शिक्षालाई प्रभावकारी बनाउन र रचनात्मक गतिविधि तथा क्रियाकलापमा ल्यापटपले टेवा पुग्ने उनले जिकिर गरे । नमुना विद्यालय शैक्षिक गुणस्तर तथा व्यवस्थापकीय कार्यान्वयन अनुदान कार्यक्रम अन्तर्गत शिक्षकलाई ल्यापटप हस्तान्तरण गरिएको प्रधानाध्यापक कोरीले बताए । शैक्षिक गुणस्तरीयतालाई मध्यनजर गर्दै आवश्यकता अनुसार बाँकी शिक्षकहरुलाई ल्यापटप वितरण गर्दै जाने विद्यालयको योजना रहेको उनको भनाई छ ।