खोज

दाङ, २ साउन ।

दाङको घोराही उपमहानगरपालिकाले गत बर्षको तुलनामा आव.२०७९÷०८० मा लक्ष्य भन्दा बढी राजश्व संकलन गरेको छ । देशको आर्थिक अवस्था कमजोर रहँदा पनि घोराहीले राजश्व संकलनमा भने प्रगति हासिल गरेको हो । नगरले घर जग्गा रजिष्टे«शन बाँडफाडबाट १४ करोड ५६ लाख २६ हजार आठ सय ८४ रुपैयाँ ८१ पैसा र नगरको राजश्व शाखा तथा १९ वटै वडाबाट २० करोड ७३ लाख २७ हजार पाँच सय ७१ रुपैया ७२ पैसा गरी जम्मा ३५ करोड २९ लाख ५४ हजार चार सय ५६ रुपैया ५३ पैसा राजश्व संकलन गरेको घोराही उपमहानगरपालिकाका लेखा अधिकृत लोकमणी शर्माले जानकारी दिए ।

उपमहानगरपालिकाले राखेको लक्ष्य भन्दा बढी राजश्व संकलन हुनुमा राजश्व शाखा तथा वडामा राजश्वमा काम गर्ने कर्मचारीको सक्रियता, मालपोत, सम्पती तथा व्यवसाय करमा दिइएको जरिवाना छुट, राजश्व गस्ती टोली परिचालन र करदातामा कर सचेतना बढ्नु मुख्य कारक रहेको उनको भनाई छ । करको दररेट खासै हेरफेर नहुनु र दायरा समेत नबढ्दा पनि यतिका राजश्व संकलन हुनु ठुलो उपलव्धि रहेको शर्माले बताए ।

जम्मा १७ करोड ५० लाख आन्तरिक राजश्व संकलन गर्ने लक्ष्य राखेकोमा आर्थिक बर्ष २०७९÷०८० मा २० करोड ७३ लाख २७ हजार पाँच सय ७१ रुपैया ७२ पैसा संकलन भएको र १४ करोड घरजग्गा रजिष्ट्रेसनबाट प्राप्त हुने लक्ष्य राखेकोमा १४ करोड ५६ लाख २६ हजार आठ सय ८४ रुपैया ८१ पैसा संकलन भएको छ । राजश्व शाखा प्रमुख कृष्ण केसीले वडागत रुपमा सवै भन्दा बढी १५ नम्वर वडाबाट तीन करोड १६ लाख ८४ हजार चार सय ८३ रुपैया २६ पैसा र वडा नम्वर १४ बाट एक करोड २१ लाख सात सय ७४ रुपैया सात पैसा राजश्व संकलन भएको बताए ।

चालु आर्थिक वर्षमा राजश्व संकलन प्रभावकारी बनाउन राजश्व गस्ती टोली परिचालन, कर संकलनमा संलग्न कर्मचारीको क्षमता अभिवृद्धि, व्यवसाय तथा मालपोत सम्पत्ती करमा असोज मसान्त सम्म १० प्रतिशत छुट तथा विगतका बर्षको बक्यौंतामा जरिवाना छुटको व्यवस्था गरिएको केसीको भनाई छ ।
मोवाईल बैंकिङ प्रणाली र क्यूआरकोड मार्फत भुक्तानी लिने तयारी
करदातालाई आकर्षित गर्न यस बर्षदेखि सुत्रमा आधारित सरकारी सफ्टवेयर जडान, प्रत्येक वडामा मोवाईल बैंकिङ प्रणाली, क्यूआरकोड मार्फत भुत्तानी, घरमै बसेर पनि कर तिर्ने व्यवस्था मिलाउन थालिएको उपमहानगरपालिकाका प्रमुख प्रशासकीय अधिकृत भोजराज घिमिरेले जानकारी दिए । नागरिकलाई सजिलो होस् भनेर यस्तो प्रणाली अपनाउन थालेको प्रशासकीय अधिकृत घिमिरेले बताए ।