खोज

रोल्पा, २ साउन ।

रोल्पामा संघ र प्रदेशबाट प्राप्त पुँजीगत वजेट मध्ये ठूलो हिस्सा खर्च हुन नसकी फिर्ता गएको छ । जिल्लाको पँुजीगत विकासका लागि आएको रकम मध्ये ५६ करोड १५ लाख ९० हजार रुपैयाँ खर्च हुन नसकेर फिर्ता गएको हो ।

रोल्पामा संघ तर्फका विभिन्न योजनाका लागि ८३ करोड २३ लाख ४३ हजार र प्रदेश तर्फ विभिन्न योजनाका लागि एक अर्व ३२ करोड ८४ लाख १८ हजार गरी कुल दुई अर्व १६ करोड सात लाख ६१ हजार बजेट प्राप्त भएको थियो । खर्च हुन नसकेर फिर्ता गएको उक्त रकम कुल वजेटको करिव २६ प्रतिशत हो ।

यसरी प्राप्त भएको वजेट मध्ये संघ तर्फका विभिन्न योजनाका लागि ५७ करोड ७४ लाख ८७ हजार र प्रदेश तर्फका विभिन्न योजनाका लागि एक अर्व दुई करोड १६ लाख ८३ हजार गरी कुल एक अर्व ५९ करोड ९१ लाख ७० हजार रुपैयाँ खर्च भएको कोष तथा लेखा नियन्त्रण कार्यालय रोल्पाले जानकारी दिएको छ ।

खर्च हुन नसकेर फिर्ता गएको बजेट मध्ये संघको २५ करोड ४८ लाख ५५ हजार र प्रदेशको ३० करोड ६७ लाख ३४ हजार रहेको छ ।

जिल्लामा संघ तर्फ पाँच अर्व ८३ करोड २६ लाख ९० हजार र प्रदेश तर्फ ७९ करोड ७३ लाख ४५ हजार गरी चालु तर्फ छ अर्व ६३ करोड ३५ हजार रुपैयाँ प्राप्त भएको थियो । चालु तर्फ प्राप्त वजेट मध्ये संघको पाँच अर्व ४० करोड २२ लाख नौ हजार र प्रदेश तर्फ ६२ करोड ७४ लाख ४४ हजार गरी कुल छ अर्व दुइ करोड ९६ लाख ५४ हजार खर्च भएको कोष तथा लेखा नियन्त्रण कार्यालय रोल्पाका सुचना अधिकारी हेमन्तराज आचार्यले जानकारी दिए ।
घटेन असारे विकास
जिल्लामा प्राप्त विकास वजेट मध्ये ठूलो हिस्सा असारमा खर्च भएको छ । संघ तर्फ प्राप्त ८३ करोड २३ लाख ४३ हजार र प्रदेश तर्फ एक अर्व ३२ करोड ८४ लाख १८ हजार गरी कुल दुई अर्व १६ करोड सात लाख ६१ हजार वजेट प्राप्त भएको थियो ।

सो मध्ये असार महिनामा मात्रै संघको १८ करोड ८३ लाख सात हजार र प्रदेशको ३४ करोड १० लाख ८८ हजार गरी कुल ५२ करोड ९३ लाख ९६ हजार रुपैयाँ खर्च भएको छ । यो रकम जिल्लामा प्राप्त विकास वजेटको कुल खर्च भएको वजेटको एक तिहाई हो । जिल्लामा संघ र प्रदेश दुवै तर्फको वर्षभरि कुल एक अर्व ५९ करोड ९१ लाख ७० हजार रुपैयाँ खर्च भएको थियो ।

“विकासको ठूलो हिस्सा खर्च हुन नसक्नु र खर्च भएको वजेट मध्ये ठूलो हिस्सा असार भित्रै खर्च गर्नुले विकासको मात्रा र गुणमा नै प्रश्न उठ्छ”– पुर्व सांसद लेखनाथ आचार्यले भने । ११ महिनासम्म घाम तापेर बस्ने र असार महिनामा मात्रै हुने कामको चटारोले अनियमितता र भ्रष्टाचारले समेत प्रश्रय पाउने गरेको पूर्व सांसद आचार्यको भनाई छ ।