खोज

बर्दघाट, १ साउन । एसीसी इमर्जिङ क्रिकेट प्रतियोगितामा नेपालको दोश्रो चरण यात्रा सकिएको छ । भारतसँगको खेलमा ९ विकेटले पराजित भएसँगै नेपालको दोश्रो चरण यात्रामा पूर्णविराम लागेको हो ।

श्रीलँकाको कोलम्बोमा जारी प्रतियोगिताको दोश्रो खेलमा टस जिती पहिले ब्याटिङ रोजेको नेपालले कमजोर प्रदर्शन गरेको थियो । नेपालले ३९ दशमलव २ ओभरमा सबै विकेट गुमाएर मात्र १ सय ६७ रन जोडन सक्यो ।

सुरुवाती ब्याटरहरु चल्न नसक्दा नेपालको ब्याटिङ लाइन धरमराएको थियो । ओपनर कुशल भुर्तेल पहिलो ओभरको दोश्रो बलमै सुन्यमा आउट भए । निकै फितलो ब्याटिङ गरेको नेपालले १० ओभरको खेल समाप्त हुँदा ५ विकेट गुमाएर मात्र ३७ रन बनाएको थियो ।

कप्तान रोहित पौडेलले सम्हालिँदै ब्याटिङ गर्दै ब्यक्तिगत ६५ रन जोडेका थिए । अलराउण्डर गुलशन झा ले आक्रमक पारी खेल्दै ३० बलमा ३८ रन जोडेका थिए । देव खनालले १५ र सोमपाल कामीले १४ बाहेक अन्य ब्याटरहरुले दोहोरो अँक समेत जोडन सकेनन् ।

भारतका लागि निशान्त सिन्धुले ४, राजवर्धनले ३, हर्षित रानाले २ र मानव सुथारले १ विकेट जोडेका थिए । १ सय ६८ लक्ष्य पच्छाएको भारत ए ले निर्धारित लक्ष्य २२ दशमलव १ ओभरमा १ विकेटको क्षतिमा भेटायो । भारतका लागि अभिषेक शर्माले ६९ बलमा ८७ रन बनाउँदै आक्रमक सुरुवात गरे । भारतका अर्का ओपनर साइ सुदर्शनले अविजित ५८ रन जोडे ।

नेपालको लागि एकमात्र विकेट कप्तान रोहित शर्माले लिन सफल रहे ।

जितसँगै भारत समुह बि को अँक तालिकाको शिर्षस्थानमा रहेको छ । २ खेलमा २ जित नै हात पारेको पाकिस्तान नेट रनरेटको आधारमा समुहको दोश्रो स्थानमा रहेको छ । २ खेलमा दुबै खेलमा पराजित हुँदै नेट रनरेटको आधारमा नेपाल तेश्रो र युएइ चौथो स्थानमा रहेका छन ।

नेपालले तेश्रो खेल युएइ सँग खेल्ने छ । नेपाल र युएइ दोश्रो चरण प्रवेशबाट वञ्चित भइसकेका छन ।