खोज

बुटवल, ३१ असार ।

आर्थिक समस्यामा रहेका उद्योगीहरुको पक्षमा सरकारको ध्यान जान नसकेको एक कार्यक्रममा बोल्ने वक्ताहरुले गुनासो गरेका छन । शनिबार सम्पन्न तिलोत्तमा उद्योग वाणिज्य संघको आठौ, नवौ वार्षिक साधारण सभामा बोल्ने वक्ताहरुले राष्ट्रिय अर्थतन्त्रमा महत्वपूर्ण योगदान दिएका उद्योगीहरुको पिडामा सरकारको ध्यान जान नसकेको गुनासो गरेका हुन् ।

संघका अध्यक्ष गुणानिधि भण्डारीले नीजि क्षेत्रको योगदानप्रति सरकार उदार भएको गुनासो गरे । निजी क्षेत्रबाट राष्ट्रिय अर्थतन्त्रमा ७७ प्रतिशत लगानी छ भने कुल ग्राहस्थ उत्पादनमा करीब ८१ प्रतिशत योगदान र करिब ८५ प्रतिशत श्रम शक्तिलाई रोजगार दिन सफल भएको उनले दाबी गरे । उद्योगी, ब्यवसायी र सर्वसाधारणको उपक्रमबाट ८५ प्रतिशत राजश्व उठ्छ । विभिन्न समस्या एवं चुनौती भोग्न बाध्य निजी क्षेत्र भुकम्प, बाढी पहिरो जस्ता दैविप्रकोप, विश्वब्यापी महामारी कोभिड १९, शक्तिशाली राष्ट्रहरुबीच हुने युद्ध जस्ता समस्या छन् भने कहिले राज्यबाट आउने विभिन्न नीति नियमका कारण उद्योगी ब्यवसायी ग्रसित भएको बेला सरकारबाट पहल नभएको दुःखेसो गरे । बैंक तथा वित्तीय संस्थाहरु अस्वाभाविक रुपमा वृद्धि गरेको ब्याजदरको विरोधमा नेपाल राष्ट्र बैकमा ज्ञापनपत्र बुझाई ध्यानाकर्षण गराएको, संघको भवनदेखि पश्चिमतर्फ सिद्धार्थ राजमार्गबाट भवन प्रवेशका लागि स्पष्ट मार्गदर्शन हुने गरी लोकनाथ पथमा तिलोत्तमा नगरपालिकाको बजेट र संघको पहलमा संयुक्त लगानीमा प्रवेशद्वार निर्माण भएको उनले बताए । औद्योगिक ग्राम निर्माणका लागि बजेट बिनियोजन गरे अनुसार उक्त ग्राममा उद्योग संचालनका लागि सहकार्य गरि छिट्टै उद्योग स्थापनार्थ पहल गर्ने बताए ।

कृषिलाई प्रोत्साहन र अर्गानिक तरकारी खेतिका लागि तिलोत्तमा नगरपालिकासंग सहकार्य गरी तरकारी खेतीका लागि पहल गर्ने, रुग्ण उद्योग र क्रसर उद्योगका लागि ब्यवसाय कर बढी तोकिएको हुँदा तिलोत्तमा नगरपालिकासंग सहकार्य गरी घटाउन पहल गर्ने, गुणस्तर र अनुगमनलाई सहजीकरण गर्ने, विशेष मेला तथा महोत्सवलाई निरन्तरता दिने उनले बताए ।

कार्यक्रमको एक समारोहका बीच नेपाल उद्योग वाणिज्य महासंघ लुम्बिनी प्रमुख कृष्ण शर्माले उदघाटन गर्दै उद्योगीको हितमा नीतिगत योजना ल्याउन महासंघमार्फत पहल जारी रहेको बताए ।

नेपाल उद्योग वाणिज्य महासंघ केन्द्रीय सदस्य राजेश कुमार अग्रवालले नेपालमा आयात दु्रत गतिमा बढेको र निर्यात घटेको बताए । स्वदेशमा उत्पादन नहुँदा अहिले यो समस्या उत्पन्न भएको उनले बताए । भारतबाट अधिकांश कच्चा पदार्थको भन्सार दर बढी, संचालन खर्च बढी जस्ता कारणले गर्दा उद्योग स्थापना गर्दा नै महङ्गो हुने तर्क गर्दै भारतमा जस्तो सरकारी अनुदान समेत नदिदा नेपालमा उद्योग चलाउनु कठिन देखिएको उनले बताए ।

अहिले सरकारबाट ब्याज दर समेत अत्यधिक बढाएको उनले दुःखेसो गरे । भारतमा संचालन भएको मौद्रिक नीति नेपालले उतार्न नसक्नु अर्को दुःखद भएको उनले बताए । नेपालमा उद्योगको सम्भावना खोजेर त्यस अनुसार नै सरकारलाई सल्लाह सुझाव दिने महासंघको योजना रहेको उनले बताए ।

कार्यक्रममा संघका वरिष्ठ उपाध्यक्ष ज्ञानेन्द्र कार्कीले कारोबार घट्ने तर ब्याज बढ्ने वर्तमान कठिन समस्यालाई सरकारबाट ध्यान हटाएको दुःखेसो गरे । सरकारलाई तिरेको कर अनुसार सरकारबाट कुनै प्रकारको सहुलियत पाउन नसकेको उनले दुखेसो गरे । धेरै पटक आफू समस्या बुझाउन कार्यालयहरुमा धाउँदा समेत कुनै सुनुवाई नभएको उनले गुनासो गरे । विदेश पलायन नै बिकल्प बनाउने गरि सरकार लागेको उनले आरोप लगाए ।

कार्यक्रममा बुटवल उद्योग वाणिज्य महासंघका अध्यक्ष उज्ज्वल कसजु, भैरहवा भन्सार कार्यालयका प्रमुख धनिराम पौडेल, संघका महासचिव राम कुमार पाण्डे, नेकपा माओवादी केन्द्रका नगरअध्यक्ष बेलप्रसाद शर्माले राज्य संचालनका लागि अधिकतम राजश्व निजी क्षेत्रबाट प्राप्त हुने हुँदा पनि यो क्षेत्रमा सरकारबाट सहयोग हुनुपर्ने बताए ।

कार्यक्रममा श्रीलंकामा भएको तेस्रो अन्तर्राष्ट्रिय स्तरीय कराँते प्रतियोगितामा स्वर्ण पदक विजेता संयम कंडेल, यु–१६ राष्ट्रिय क्रिकेट टिमबाट स्वर्ण पदक विजेता तिलोत्तमा नगरपालिका निवासी प्रतिक भट्टराईलाई सम्मान गरिएको थियो ।