खोज

सुर्खेत, २८ असार ।

नेकपा एमालेको कर्णाली प्रदेश प्रचार तथा प्रकाशन विभागको योजना तर्जुमा विस्तारित बैठक सुर्खेतमा सम्पन्न भएको छ । विहिबार सम्पन्न बैठकमा एमालेका उपमहासचिव प्रदिप ज्ञवालीले एमाले कमजोर बन्दा राष्ट्रियता, स्वाधीनता र लोकतन्त्र कमजोर हुने भएकाले एमालेको सुदृढ एकता आवश्यक रहेको बताएका छन् । हालको सरकारले नेपालको सार्वभौमसत्ता नेपाली जनतामा नभै विदेशीको हातमा छ भनेर निर्लज्जता प्रकट गरेको भन्दै ज्ञवालीले एमाले कमजोर हुंदा वाहिरी हस्तक्षेप बढेको प्रष्ट रुपमा देखिएको बताए ।

एमालेको नेतृत्व यो देशका लागि अनिवार्य रहेको उल्लेख गर्दै उपमहासचिव ज्ञवालीले आफ्नो पार्टी भिभिन्न परीक्षणमा उत्तीर्ण हुँदै यहाँ सम्म आइपुगेको बताए । पार्टी दर्ताको मितिले गर्दा कुनै पनि पार्टी नयाँ पुरानो नहुने भन्दै उनले कस्तो विचार बोकेको छ त्यो विचार र योजनाले पार्टी नयाँ पुरानो हुने बताए । रुपान्तरणकारी दीर्घकालीन योजनाहरु लगायत विभिन्न बिषयमा र विद्यमान पार्टीहरु मध्ये राज्य संचालनका सन्दर्भमा नेकपा एमाले सक्षम पार्टी रहेको उनको दाबी छ । पार्टी प्रचार र प्रकाशनको कामलाई व्यवस्थित गरेर लैजानुपर्ने भन्दै ज्ञवालीले न्यु मिडियाको प्रभाव र दुष्प्रभाव त्यत्तिकै रहेकाले यसको उपयोगमा ध्यान पुर्याउनुपर्ने धारण राखे ।

प्रचार तथा प्रकाशन विभागको बैठकमा आगामी कार्ययोजना, पार्टीको मुखपत्र, प्रचार कार्यमा न्यु मिडियाको प्रयोग लगायतको बिषयमा छलफल र आवश्यक निर्णय गरिएको प्रचार विभाग कर्णालीका सदस्य तथा एमाले सल्यानका सचिव ओज बहादुर बुढाथोकीले जानकारी दिए ।

बैठकमा निर्देशनात्मक मन्तव्य राख्दै एमाले केन्द्रीय सचिव तथा कर्णाली प्रदेश इन्चार्ज लेखराज भट्टले पार्टीको विचार र नेतृत्वको रक्षामा बलियो संग उभिन निर्देशन दिए । एमाले र एमालेको सक्षम नेतृत्वप्रति डर त्रास भएका कारण भिभिन्न शक्तिहरु आक्रमणमा उत्रिएको उनको भनाइ छ ।

पार्टिका केन्द्रीय प्रचार बिभाग प्रमुख राजेन्द्र गौतमले संचार क्षेत्रको उपयोगमा जोड दिदै संचारमा लगानी बढाउनुपर्ने बताए । उनले कर्णाली प्रदेश प्रचार कमिटिलाइ कार्यान्वयन हुने योजना बनाउन आग्रह गरे ।

एमाले स्थायी कमिटी सदस्यहरु यामलाल कंडेल, गोरख बहादुर बोगटी, एमाले कर्णालीका अध्यक्ष बिनोद कुमार शाहले प्रचार विभागको कार्ययोजना अनुसारका गतिविधी संचालनका लागि सहयोग रहने प्रतिबद्धता जनाए ।

प्रेस चौत्रारी नेपालका केन्द्रीय अध्यक्ष गणेश बस्नेतले प्रचारको कामलाइ प्रभावकारी बनाउन पार्टी र प्रेस चौतारिका विचमा आवश्यक समन्वय हुनुपर्ने बताए ।

प्रचार विभाग कर्णालीका अध्यक्ष सुर्यमणी गौतमले एमालेलाइ बलियो बनाउनका लागि प्रचार विभागको कामलाइ स्तरिय गराइने बताए ।

बैठकमा निरज आचार्यले प्रचार विभागको खाका प्रस्तुत गरेका थिए भने प्रविधिको प्रयोग बारे तेज प्रकाश जिसी, आम संचार र सामाजिक संजाल प्रयोग सम्बन्धमा गगन बिष्ट, पत्रकार महासंघमा प्रेस चौतारीको अवस्था बारे नवराज महताराले आफ्नो प्रस्तुती राखेका थिए ।