खोज

बुटवल, १९ असार  लुम्बिनी साँस्कृतिक नगरपालिकासंग भगिनी सम्बन्ध कायम भएको स्पेनको काथेरेस नगरपालिकाले लुम्बिनी बुद्ध गार्डेन प्रोजेक्ट अन्तरगत स्पेनको काथेरेसमा लुम्बिनी बुद्धपार्क निमार्ण गरिने भएको छ । स्पेनको काथेरेस नगरपालिका कार्यालयमा आयोजना गरेको पर्यटन प्रवर्द्धन र विकासका लागी लुम्बिनी सास्कृतिक नगरपालिका, लुम्बिनी गार्डेन स्थापना गर्ने सहकार्य सम्बन्धि अन्तर्कृया कार्यक्रममा सो निर्णय भएको लुम्बिनी साँस्कृतिक नगरपालिकाका नगरप्रमुख सजरुद्धिन मुसलमानले बताए ।

पालिका विचको सम्बन्ध, सहकार्य, समन्वय, अनुभव र सहयोग आदानप्रदान सम्बन्धी समन्वय बैठकमा काथेरेस नगरपालिकाका नवनिर्वाचित नगरप्रमुख राफेल एन्टोनियो माटेओस कासेरेस एक्स्टे«माडुरालाई बधाई एवम् कार्यकाल सफलताको शुभकामना व्यक्त गर्दै नगरप्रमुख मुसलमानले विश्व शान्तीका अग्रदुत बुद्ध जन्मस्थल लुम्बिनी सास्कृतिक नगरपालिकाको भ्रमणको निम्तोपत्र प्रदान गरेका छन । लुम्बिनी र नेपालको अन्तर्राष्ट्रिय स्तरमा प्रचारप्रसार एवं काथेरेस र लुम्बिनीको पर्यटन प्रवर्द्धन र विकासका लागी अन्तर्राष्ट्रिय सहयोग र अनुभवको आदान प्रदान गर्ने उद्धेश्यका साथ सहकार्य संस्था लुम्बिनी गार्डेन फाउन्डेसनद्धारा काथेरेस नगरपालिकाले काथेरेसमा लुम्बिनी बुद्ध पार्क प्रोजेक्ट निर्माण सम्बन्धमा अन्तरक्रिया गरेको उनले बताए ।

कार्यक्रममा दुबै नगरका नगरप्रमुख लुम्बिनी साँस्कृतिक नगरपालिकाका नगरप्रमुख सजरुद्धिन मुसलमान, काथेरेस नगरपालिकाका नवनिर्वाचित नगर प्रमुख राफेल एन्टोनियो माटेओस कासेरेस एक्स्टे«माडुरा स्पेन र सहकार्य सस्था लुम्बिनी गार्डेन फाउण्डेसन स्पेनका अध्यक्ष जोसे म्यानुअल विलानोधा अलेमान प्रमुख संरक्षक निरज गोविन्द श्रेष्ठले समन्वय र सहकार्यमा लुम्बिनी बुद्ध गार्डेन प्रोजेक्टलाई सफल पार्ने प्रतिवद्धता जनाए ।

लुम्बिनी साँस्कृतिक नगरपालिकाका नगरप्रमुख सजरुद्धिन मुसलमानले बिश्व सम्पदा सुचीमा रहेको ऐतिहासिक शहरको मेयरमा निर्वाचित भएकोमा बधाई साथै कार्यकाल सफलताको शुभकामना व्यक्त गरे । कार्यक्रममा नवलपरासी जिल्ला कावासोती नगरपालिकाका प्रमुख प्रशासकिय अधिकृत भुपेन्द्र पाण्डेय, लुम्बिनी साँस्कृतिक नगरपालिकाका लेखा अधिकृत रामचन्द्र अर्याल, लुम्बिनी साँस्कृतिक नगरपालिकाका समन्वय अधिकृत तुलसीराम लामिछानेले दुई देशको पालिकाको सम्बन्ध बिस्तारसंगै पर्यटन विकासमा टेवा पुग्ने बताए ।