खोज

बुटवल, १९ असार ।

बुटवलको कालिका मानवज्ञान मावि देशमै असल अभ्यासहरुको संकलन, प्रकाशन र प्रबोधिकरण कार्यक्रम गर्ने विद्यालयमा प्रथम स्थान हासिल गरेको छ । मंगलबार शिक्षा, बिज्ञान तथा प्रविधि मन्त्रालय अन्तर्गत शिक्षा तथा मानव श्रोत विकास केन्द्रका निर्देशक गोविन्दराज पोख्रेलबाट पत्रमार्फत प्रथम भएको जानकारी दिईएको विद्यालयका प्रधानाध्यापक दिनेश थापाले बताए ।

‘हाम्रो विद्यालय असल अभ्यासहरुको संकलन, प्रकाशन र प्रवोधिकरण कार्यक्रम केन्द्रको निर्णय अनुसार विद्यालय उत्कृष्ट कार्य गरेको मध्येबाट प्रथम स्थान हासिल गर्न सफल भएको छ’— उनले भने । देशभरका सामुदायिक विद्यालयहरुमध्येबाट ४ सय २२ नमुना विद्यालयबिचमा कालिका प्रथम भएको हो । रुपन्देहीमा नमुना विद्यालय ८ वटा छन् ।

विद्यालय आसपासका आठ वटा सामुदायिक विद्यालयका ब्यवस्थापन समितिका अध्यक्ष वा प्रतिनिधिमध्ये एक र विद्यालयका प्रधानाध्यापकलाई तालिम गराउने जिम्मेवारी दिईएको छ ।

यो वर्षमात्र विद्यालयले ललिलपुर, स्याङ्जा, पाल्पा, रोल्पा, प्युठान, कपिलवस्तु, गुल्मी, नवलपुर, बाके, बर्दिया, कैलाली, जुम्ला लगायत जिल्लाका डेढ दर्जन भन्दा बढी पालिकाहरुमा असल अभ्यासका कार्यक्रम गरिरहेको उनले बताए । जसमा सांगितिक ब्यायाम, प्रार्थना ब्यवस्थापन कार्यशाला समेत गरिएको हो ।

यसैगरी विद्यालयबाट यो वर्ष १५ जनाले एमबिबिएसमा स्कलर्शसीप पाएका छन् । गतवर्ष १३ जनाले नाम निकालेको उनले बताए । देशभरमै सरकारी स्कुलबाट सबैभन्दा धेरै नाम निकाल्ने विद्यालय भएको उनले दाबी गरे । यसैगरी ईन्जिनियरिङतर्फ गतवर्ष ३९ जनासहित बिईमा एक सय जना बढीले नाम निकालेका छन् । कालिका मानव ज्ञान मावि नर्सरीदेखि १२ कक्षासम्म दुई सेक्टरमा गरी ७ हजार ६ सय ३९ विद्यार्थीहरु अध्ययरत छन् ।

विद्यालयका खेलकुद प्रशिक्षक तथा म्युजिकल पिटिका राष्ट्रिय अभियन्ता हरिश वलीले कालिकामा गरिएका असल अभ्यासलाई अन्य सामुदायिक विद्यालयहरुमा समेत सिकाई अभ्यास र सांगितिक ब्यायाम तथा प्रार्थना ब्यवस्थापन कार्यशाला गरिएको बताए । बच्चाको अनुशासन, संस्कार, पढाईको तयारीका बारेमा समेत सिकाई हुने उनले बताए । देशका ३ सय ९४ स्थानीय तहका सामुदायिक विद्यालयमा यो अभ्यास चलिरहेको उनले बताए । देशका ७ सय २० सामुदायिक विद्यालयमा कार्यक्रम गरिएको हो ।