खोज

बुटवल, १७ असार ।

नेपाल कम्युनिष्ट पार्टी (एमाले) बुटवल उपमहानगर कमिटीले पार्टीको वार्षिक कार्ययोजना निर्माण गरेको छ । आइतबार बसेको नगर कमिटीको १० औ पुर्ण बैठकले कार्ययोजना तय गरेको हो । पार्टी केन्द्र, प्रदेश र जिल्ला कमिटी लगायतका नेताहरुको सुझाव र पार्टी जिल्ला कमिटीले जारी गरेको परिपत्रको आधारमा वार्षिक कार्ययोजना बनाइएको एमाले नगर अध्यक्ष किसन ज्ञवालीले जानकारी दिए ।

कार्ययोजना अन्र्तगत असार महिनालाई सदस्यता नविकरण अभियान ,साउनमा पार्टी सदस्यता विस्तार, भदौ महिना प्रशिक्षणको महिना, असोज महिना युवासंग पार्टी अभियान, पार्टी तथा जनसंगठन सुढृढीकरणक, पुनर्मिलनलगायत महिनामा कम्तिमा एउटा विकास निर्माण, सुशासन, सेवा प्रवाह र भ्रष्टाचार विरुद्धको दबाब, जागरण र पैरवी सम्बन्धी कार्यक्रमम समावेश गरिएको छ ।

बैठकले हालसम्म ८ वटा विभागहरुको बैठक सम्पन्न भईसकेको अवस्थामा आगामी असार मसान्त भित्रमा नगर सल्लाहकार परिष्द, नगर जेष्ठ कम्युनिष्ट मञ्च, विभाग र नगर स्तरिय जनसंगठन समन्वय संयन्त्रको बैठक सम्पन्न गर्ने निर्णय गरेको छ ।

आगामी साउन मसान्त सम्ममा पार्टी बुटवल उपमहानगरपालिका कमिटीको लेखा परीक्षण सम्पन्न गर्ने, आगामी साउन मसान्त सम्ममा सम्पूर्ण वडाहरुको बैकिङ्ग खाता सञ्चालन र लेखा परिक्षणको काम अनिवार्यरुपमा सम्पन्न गर्ने निर्णय गरेको कमिटीका सचिव मेघराज भट्टराईले जानकारी दिए ।
साथै पार्टी एकता तथा पार्टी प्रवेशको पक्रियाबाट आएका हिरा केसी, विनोद बिक, शालिकराम शर्मा पौडेल, सूर्य प्रसाद न्यौपाने र हेमराज शाहीलाई पार्टीको बुटवल उपमहानगरपालिका कमिटीको वैकल्पिक सदस्यमा मनोनयन गर्ने निर्णय गरेको छ ।

हालका लागि नगर कमिटी सदस्य विनोद पौडेललाई शाखा कमिटी ३ को इन्चार्जको जिम्मेवारी प्रदान गर्ने र नगर कमिटीका सदस्य रामकृष्ण चापागाई र हेमन्त घिमिरेलाई नगर कमिटीको सचिवालय सदस्यमा मनोनयन गर्ने निर्णय गरेको छ ।

बैठकलाई संबोधन गर्दै एमाले पोलिटब्युरो सदस्य तथा बुटवल उपमहानगर इन्चार्ज दधिराम न्यौपानेले एमाले मात्रै एउटा बलियो पार्टी भएको बताउदै यस क्षेत्रका महत्वपूर्ण योजनाका काम नेकपा एमालेको नेतृत्वमा सम्पन्न भएको बताए ।

“कम्युनिस्ट पार्टी भनेको अविरल बगिराख्ने समुन्द्र हो, यो पार्टीको सदस्य कहिले पनि निराश हुन हुँदैन, एमाले संग अन्य पार्टी डराईरहेका छन्, निरन्तर लागिरहेका छन्, देश निर्माणका लागि एक्लै उभिने पार्टी एमाले हो, सबै पार्टी पंक्ति निरन्तर सकारात्मक ढंगबाट लागौ”– न्यौपानेले भने ।

वडातह, टोलटोलबाटै एमाले नेतृत्वको सरकारले गरेका कामका बारेमा जानकारी दिन आवश्यक रहेको बताउदै न्यौपानेले पार्टीमा आवद्ध सदस्यहरुले आ आफ्नो जिम्मेवारीका साथ सदस्यता नविकरण गर्न अनुरोध गरे । न्यौपानेले कोही कसैको एक्लो प्रयासले मात्रै कुनै पनि ठाउँमा सफलता हासिल गर्न नसकिने बताउँदै पार्टीमा आवद्ध सबै सदस्यहरु जुझारु हुन आवशयक रहेको बताए ।

पार्टीका जिल्ला अध्यक्ष तेजेन्द्र केसीले पार्टीको निर्णयलाई सबैले मान्नुपर्ने बताउँदै बडा कमिटीदेखि आफ्ना आनीबानी संस्कार बदल्न जरुरी रहेको बताए । सोही क्रममा पार्टीले संचालन गरेको मिसन ग्रासरुट अभियानको नगर कमिटीको प्रतिवेदन नगर कमिटी अध्यक्ष ज्ञवालीले जिल्ला अध्यक्ष केसीलाई हस्तान्तरण गरे ।

जिल्ला कमिटी सचिवालय सदस्य तथा बुटवल इन्चार्ज ऋषिराम पाण्डेले असार ४ गते बसेको जिल्ला कमिटी बैठकले गरेका निर्णयहरुका बारेमा जानकारी गराएका थिए । पाण्डेले रचनात्मक र सिर्जनात्मक अभियान निरन्तरता दिदै पार्टी अगाडी बढ्नुको बिकल्प नभएको बताए । बैठकमा एमाले नेताहरु जिल्ला सचिव यज्ञ गैरे, एकराज बिश्वकर्मा , जिल्ला कमिटी सचिवालय सदस्य स्कुल बिभाग प्रमुख युवराज घिमिरे, जिल्ला कमिटी सचिवालय सदस्य निबर्तमान नगर अध्यक्ष बाबुराम पन्थी, नारायण भट्टराई, कमिटी सदस्य राजेन्द्र ढकाल लगायतले बोलेका थिए ।