खोज

बुटवल —

लुम्बिनी प्रदेश सरकारले आगामी आर्थिक वर्ष २०८०/०८१ का लागि ल्याएको बजेटमाथि छलफल गर्न आज आइतबार प्रदेशसभाको बैठक बस्दै छ । यधपि बजेटबारे प्रमुख प्रतिपक्षी दल एमाले विरोध कायमै छ । सत्तापक्षीय सांसद समेत असन्तुष्ट रहेको बेला प्रदेशसभा चल्ने र बजेट बारेको छलफल हुनेमा भने आशंका छ ।

असार १ गते अर्र्थमन्त्री धनबहादुर मास्केले ४० अर्ब ४७ करोड ८९ लाख बराबरको बजेट प्रदेशसभामा पेस गरेका थिए । बजेटबारे सहमति नजुट्दा बजेट पेश भएको दुई साता नाघिसक्दा पनि छलफल सुरु भएको छैन । असार १० गते बजेटमाथि छलफल गर्ने गरी आव्हान गरिएको प्रदेशसभा बैठक आन्तरिक तयारी नपुगेको भन्दै सूचना टाँसेर स्थगित भएको थियो ।

त्यसपछि असार १३ गते बैठक बसेको थियो । बैठकपछि प्रमुख प्रतिपक्षी दल नेकपा एमालेले बजेट नीति र सिद्धान्तविपरीत भएको भन्दै विरोध गरेपछि प्रदेशसभामा बजेटले प्रवेश नै पाएको छैन । विपक्षी दल एमालेले मुख्यमन्त्री कार्यालयमा शीर्षक नखुलाई एकमुष्ठ दुई अर्ब बजेट छुट्याएको, प्रदेश बिना कारण निर्देशनालयहरू खारेज गरेको, बहुवर्षीय र क्रमागत योजनाको बजेट कटौती गरेको र आफू अनुकूलका मात्रै बजेट विनियोजन गरेकोप्रति आपत्ति जनाउँदै त्यसको कारण माग गरेको छ ।

अवरोधका कारण स्थगित भएको बैठक आज आइतबार बोलाइएको हो । सभामुख तुलाराम घर्तीमगरले राप्ती उपत्याका दाङमा दिउँसो १ बजे बस्ने बैठकमा बजेटमाथि छलफल हुने कार्यसूची रहेको बताए । त्यसका लागि बिहान ११ बजे कार्यपरामर्श समितिको बैठक बसेर प्रदेशसभा बैठकको कार्यसूची तय गर्ने तयारी छ ।

सरकार जसरी पनि बजेटमाथि छलफल गरी पारित गर्ने तयारीमा जुटेका बेला विपक्षी दल एमालेले भने आफूले उठाएको प्रशनको चित्तबुझ्दो जवाफ नपाएसम्म प्रदेशसभा चल्न नदिने अडानमा छ । यसअघि मुख्यमन्त्री डिल्लीबहादुर चौधरी र प्रमुख प्रतिपक्षी एमालेका लीला गिरिबीच असार १४ गते छलफल गर्ने अनौपचारिक सहमति भएको थियो । तर उनीहरुबीच अहिलेसम्म सहमतिका लागि कुनै छलफल भएको छैन ।

एमाले संसदीय दलका नेता गिरीले सरकारले बजेटबारेका माग र प्रश्नबारे अहिलेसम्म कुनै छलफल नगरेकाले यही अवस्थामा प्रदेशसभा चल्न नदिने र विरोधमा उत्रने बताए । बजेट विनियोजन गर्दा समानुपातिक रुपमा विनियोजन नगरिएको, बहुवर्षीय र प्रदेश गौरवका आयोजनालाई प्राथमिकतामा नराखेको र आफू अनुकूलका अबण्डा बजेट राखेकाले तिनलाई परिमार्जन नगरी एमाले सहमतिमा नआउने उनले बताए ।

यता प्रदेश सरकारका प्रवक्ता सन्तोषकुमार पाण्डेले विपक्षी दललाई सहमतिमा ल्याउन अन्तिम समयसम्म प्रयास गर्ने नत्र बहुमतबाट अगाडि बढ्ने बताए ।