खोज

भैरहवा, असार- गर्मीको समयामा बिद्युतले लाइन काट्दा सेवाग्राहीलाई समस्या परेको भन्दै भैरहवा बितरण शाखालाई ध्यानाकर्षण गराएका छन् । अनियमित बिजुली काट्न बन्द नगरे कडा खालको आन्दोलन गर्ने चेतावनी समेत दिइएको छ ।

आइतबार नेपाल विद्युत प्राधिकरण भैरहवा वितरण केन्द्र पुगेको बैदिक सनातन धर्म सेवा समिति सिद्धार्थनगरको टोलीसहित स्थानीयले अनियमित कटौतीका कारण घरमै बस्नै नसकिने अवस्था रहेको बताए । नेपाललाई लोडसेडिङमुक्त घोषणा गरिए पनि पटकपटक विद्युत कटौती किन हुन्छ भन्दै उनीहरुले प्राधिकरणलाई प्रश्न गरेका छन् । उखरमाउलो गर्मीमा जीवन कष्टकर भइरहेको भन्दै अनियमित विद्युत कटौती कहिलेसम्म भन्ने उनीहरुको प्रश्न छ ।
सिद्धार्थनगर १० निवासी टिका जिसीले सरकारले लु चलेको छ बाहिर नजा भन्ने गरेको तर बिधुत प्राधिकरणले पटक पटक लाइन काट्दा समस्यामा परेको बताए ।
“सरकारले ३०० मेगावाट बिजुली भारतलाई बेचेर प्रधानमन्त्रीले १५ वटा रांगा ल्याउनुभयो म बिन्ति गर्छु त्यो बिजुलि फिर्ता ल्याइयोस म १५ वटा रांगा नेपाल सरकारलाई मेरो जग्गा बेचेर, कतै मागेर भएपनि उपलब्ध गराउंछु जीसिले भने ।“

भैरहवा मर्निङ वाक ग्रुपका संस्थापक अध्यक्षसमेत रहेका साहित्यकार विजय सागरले रातको समयमा विद्युत आपूर्ति नहुँदा गर्मीले बालबालिका रोइरहेको र सुत्न नसकेको बताए । उनले अनियमित विद्युत आपूर्तिका कारण विद्युतीय उपकरण बिग्रिएको बताए । उनले भने, ‘जनतालाई दुःख दिन पाइँदैन । लोडसेडिङमुक्त देश घोषणा गरिएको नेपालमा एक दिनमा ४० पटकसम्म लाइन काटिन्छ । कि त लोडसेडिङको तालिका दिनुपर्यो होइन भने नियमित विद्युत आपूर्ति हुनुपर्छ ।’व्यवसायी अरुण लामिछानेले विद्युत प्राधिकरण भैरहवा वितरण केन्द्रमा विद्युतसम्बन्धी जानकारी लिन खोज्ने प्रयासका लागि पटकपटक फोन गर्दा फोन कहिल्यै नलागेको बताए । उनले भने, ‘विगत ३ वर्षदेखि मैले विद्युत कार्यालयको इमरजेन्सी नम्बरमा फोन गर्दै आएको छु, तर अहिलेसम्म कुरा गर्न पाएको छैन ।’स्थानीय मीना श्रेष्ठले दुःख जनतालाई मात्र दिइएको बताइन् । उनले महंगीबाट पीडित नागरिक अहिले अनियमित विद्युत कटौतीबाट पीडित भएको बताइन् । उनले भनिन्, ‘घरका विद्युतीय उपकरण बिग्रिएका छन्, महंगी बढेको छ । कसरी मर्मत गराउने ?भैरहवा मर्निङ वाक ग्रुपका अध्यक्ष तथा व्यवसायी ओमकार गौचनले रहरले नभइ बाध्यताले विद्युत कार्यालयलाई ध्यानाकर्षण गराउन आएको बताए । उनले भने, ‘रहरले यहाँ आएको होइनौ, समस्या समाधान नभए अब चुप लागेर बस्दैनौ । ’
बैदिक सनातन धर्म सेवा समिति सिद्धार्थनगरकी अध्यक्ष विनिता श्रेष्ठले जनताले दुःख पाइरहेको बताइन् । सिद्धार्थनगर नगरपालिका वडा नम्बर १३ की वडा सदस्य निलु श्रीस मगरले सरकारले बाहिर ननिस्कन भन्ने अनि विद्युत कटौती हुँदा घरमा कसरी बस्ने भन्दै प्रश्न गरिन् ।

स्थानीय आकाश पौडेल, सन्त धवल, विष्णु माया शर्मा पौडेल, पूर्व वडा सदस्य रुपमाया पुनलगायतले बोल्दै विद्युत प्राधिकरण समस्या समाधानमा लाग्नुपर्ने बताइन् ।नेपाल विद्युत प्राधिकरण भैरहवा वितरण केन्द्रका प्रमुख इञ्जिनियर संजय कुमार मिश्रले समस्या समाधानका लागि लागिपरेको आश्वासन दिए । उनले विद्युत कटौती भैरहवाको मात्र नभइ राष्ट्रव्यापी समस्या भएको बताए । उनले भने, ‘पानी परे समस्या स्वतः समाधान हुन्छ । ’