खोज

चन्द्रौटा(कपिलवस्तु),  जेठ ।- २०७३ सालमा उद्योग दर्ता गरी २ वर्ष पछि मोजा उत्पादन सुरुवात गरिएको थियो । सुरुवाती चरणमा ३ वटा उपकरण प्रयोगगरी करिब दैनिक ६० दर्जन मोजा उत्पादन गरिन्थ्यो । उत्पादन कम भएपछि सञ्चालन खर्चिलो भएपनि १३ वटा मिसिन थप गरिएको थियो । कपिलवस्तुका एक अधिकारी दाजुभाईले यसरी सञ्चालन गरेका थिए, होजियारी उद्योग ।

कच्चापदार्थ धागोबाट सामग्री उत्पादन उद्योगको अनुभव लिएर दाजुभाइले कोरियन प्रविधि (निटिङ सक्स मिसिन) को प्रयोग गरी होजियारी उद्योग सञ्चालन गरेका छन् ।
बाणगंगा नगरपालिकाको वडा नम्बर–४ दरखास्तमा करिब डेढ करोडको लागतमा वराह होजियारी उद्योग सञ्चालन गरिएको एकराज अधिकारी बताउँछन् ।

सञ्चालक एकराज अजरबैजान र भारतको होजियारी उद्योगमा सुपरभाइजर भइ काम गरेको अनुभवलाई स्वदेशमा प्रयोग गरिएको उनले बताए । वैदेशिक २५ वर्षको होजियारी उद्योगको कार्य अनुभवले मोजा उत्पादन सञ्चालन गरिएको अधिकारीले भने । स्वदेशी ब्राण्डलाई पहिचान बनाउने गरी मोजा उत्पादन सुरु गरिएको थियो । विषयगत दक्षता भएपछि उत्पादन बेच्न सहज हुने अनुमान गरेपनि बजारमा बिक्री गर्न धौ–धौ भयो ।

“बिक्रीकोलागि बजार पु¥याइयो तर कसैले चासो दिएनन् । व्यापारीले नाइक, एडिडास जस्ता विदेशी नाम भए बिक्री हुने बताए । विदेशी ट्याग लगाए मात्र नेपालीले किन्ने रहेछ । हामीले “बिएचयु” नाम राखेर बेच्न लगियो ।” उद्योग सञ्चालक अधिकारीले भने ; “उद्योग सुरु गरेको २ वर्ष सम्म बेच्न सकस भयो । अहिले केही सहज भएको छ । ग्राहकले विदेशी नाम रोज्ने ब्यापारीले महँगोमा बेच्न सकिने भएपछि गुणस्तरीय नेपाली ब्राण्ड ओझेलमा परेको छ ।”

स्वदेशी उत्पादन भनेपछि व्यापारीले खरिद गर्न आनाकानी गर्दा २ वर्ष सम्म बजार नपाएको एकराजको भनाइ छ ।
अहिले आर्थिक मन्दी र भारतबाट अवैध भित्रिदा दैनिक २ हजार मोजा उत्पादन गरिएको उनले जनाए । उद्योगबाट स्पोर्ट, अफिसियल, नेपाली सेना, विद्यालय, फ्ल्याट, एङगल, हाफ एङगल, लेडिज, ट्रेकिङ् गरी १५ थरीमा मोजा उत्पादन गर्ने गरेको एकराजले जानकारी दिए ।

कम्पनीबाट उत्पादन भएका मोजा एक सातासम्म प्रयोग गर्दासमेत दुर्गन्ध नआउने सञ्चालकको दावी छ । दैनिक ४ हजार जोर मोजा १६ मिसिनबाट उत्पादन गर्ने क्षमता छ । खिमलालले अधिकारीले बजारमा विदेशी नाम राखेका उत्पादन ग्राहकले रोज्दा ती भन्दा गुणस्तर नेपाली ब्राण्डले पहिचान नपाएको बताए । एकराज अधिकारी र खिमलाल अधिकारी दाजुभाइ हुन् । व्यापारीलाई सन्तुष्ट बनाएपछि हाल “बिएचयु (कम्पनीले उत्पादन गरेको ब्राण्ड)” नाम लिएर माग्न लागेको जनाइएको छ । आफ्नो नामको ट्रेडमार्क दर्ता गर्ने तयारी रहेको सञ्चालकको भनाई छ ।