खोज

चन्द्रौटा(कपिलवस्तु), -जेठ- कपिलवस्तुको विजयनगर गाउँपालिकामा अनुगमन फितलो भएकै कारणले कमसल संरचना निर्माण भएको पाइएको छ । पालिका भित्र हुने गरेका विकास निर्माणका अधिकांश स्थानमा कमसल सामग्रीको प्रयोग गरि संरचना निर्माण हुने गरेको गुनासो व्यापक बढ्दो छ । यस्तै देवीपुर कृषि बाटोमा कल्भर्ट निर्माण भएको महिनादिन नबित्दै भत्किएको छ । वडा नम्बर–५ मा निर्माण भएको कल्भर्टको छेउको पिसिसि ढलान महिना दिन पुग्दै भत्किँदा कमसल सामग्री प्रयोग गरिएको स्थानीयले गुनासो गरेका छन् ।

स्थानीयका अनससार बाटोमा कल्भर्ट निर्माण गरिएको बाटोको २ मिटर पिसिसि ढलान भत्किएको छ । समयमै गाउँपालिकाले अनुगमन नगर्दा गुणस्तरहीन काम भएको एक स्थानीयले आरोप लगाए । विकास निर्माणका अधिकांश कार्य क्षेत्रमा अनुगमन फितलो भएकै कारणले कमसल सामग्री प्रयोग हुने गरेको स्थानीय बताउँछन् ।
उनले भने ः “विकास गरौं तर नामका लागि मात्र होईन । निर्माण भएको १ महिना नपुदै यसरी भत्किने बिकासले बजेट मात्र नास हुने र जनताको करको दुरुपयोग बड्दै जाने हुन्छ ।“ सकिन्छ गुणस्तरीय काम गरौं सकिन्न भने पैसा खर्चका लागि मात्र विकास नगरौं भन्दै उनले थपे ः “विनाश भएर जाने विकासले न सुविधा दिन्छ न सन्तुष्टि त्यसैले अनुगमन प्रभावकारी ढंगले गरौं ।“

यता कल्भर्ट उपभोक्ता निर्माण समितिका अध्यक्ष चित्र बहादुर बलालले नयाँ माटो पटान भएकोले पिसिसि ढलान भत्किएको बताए । उक्त स्थानमा पिसिसि ढलानको निर्माण कार्य सुरु गरिएको समेत उनले बताए । निर्माण भएको साता दिन नबित्दै रातिको समयमा ट्रेक्टरमा गुड्दा ढलानको दुबै छेउ भत्किएको अध्यक्ष बलालले जानकारी दिए ।
यता प्राविधिक नविन डुम्रेले नयाँ माटो पटान भएकोले भत्किएको बताए । नयाँ माटोमा पिसिसि ढलान गर्दा पिपिसीसहित सडक भत्किएको जनाए । कल्भर्ट र पिपिसी लगायत निर्माणको भुक्तानी नभएको र पुनः निर्माण नभएसम्म भुक्तानी नहुने उनको भनाइ छ । गाउँपालिकाको ४ लाखको लागतमा देवीपुर कृषि बाटोमा कल्भर्ट सहित बाटो पिपिसी निर्माण भएको थियो । गाउँपालिका उपाध्यक्ष लक्ष्मी कुमारी चौधरीले स्थलगततबरले प्रभावकारी अनुगमन गरेको जिकिर गरिन् ।