खोज

दाङ, ७ जेठ ।

नेकपा एमालेका महासचिव शंकर पोखरेलले सरकार संचालन गर्न राजनीतिक र नीतिगत नेतृत्व चाहिने बताएका छन् । त्यसको नेतृत्व एमालेले गर्छ भन्दै उनले भने, “चर्चाले मुलुक बन्दैन, राजनीतिक विचार र नेतृत्व चाहिन्छ ।”

प्रेस चौतारी दाङले आइतबार घोराहीमा आयोजना गरेको पत्रकार सम्मेलनमा उनले सरकारको नीति तथा कार्यक्रमले राष्ट्रिय समस्या सम्बोधन गर्न नसकेको बताए । “न नीति न कार्यक्रम”– उनले भने, “सरकारले ल्याएको नीति तथा कार्यक्रमको चर्चा हुनुपथ्र्यो । तर, राष्ट्रपतिको सवारी, सम्बोधन कसरी भयो भन्ने मात्रै चर्चामा छ ।”

सरकारले ल्याएको नीति तथा कार्यक्रमले सामाजिक, सांस्कृतिक, आर्थिक बिषय ओझेलमा पारेको बताए । बढ्दो आर्थिक संकट, सांस्कृतिक हस्तक्षेप र सामाजिक विचलनका मुद्दा अहिलेको प्रमुख समस्या भएपनि सरकारले ल्याएको नीति कार्यक्रमले छुन नसकेको उनले बताए । “राजनीतिक अस्थिरता र सामाजिक अराजकतामाथि बिजय हासिल गर्नेगरी कार्यक्रम आउनुपर्ने थियो”–उनले भने–“राष्ट्रको मूल समस्यामा सरकारको ध्यान पुग्नै सकिन । सांस्कृतिक मूल्यहरुलाई स्थापित गर्ने कुरालाई नीति तथा कार्यक्रमले छोएन । मुलुक आर्थिक मन्दीको अवस्था छ । व्यवसाय ठप्प छ । वित्तीय संकट छ । नीति तथा कार्यक्रमले आशा जगाउन सकेन ।” उनले नीति कार्यक्रम कोरा भाषण मात्रै भएको टिप्पणी गरे । “नीति तथा कार्यक्रम छैन, एक घण्टा ४० मिनेटको भाषण छ”, उनले भने, “मुल समस्या सम्बोधन गर्न सकेन ।”

उनले मुलुकमा बलियो राष्ट्रिय शक्ति निर्माण गर्न राजनीतिक ध्रुवीकरण आवश्यक रहेको बताए । जनताको विकास र समृद्धिको आशालाई राजनीतिक अस्थिरताले असर गरेको उनको भनाई छ । देशमा देखिएको अन्यौल हटाउन नयाँ राजनीतिक शक्ति निर्माण गर्नुपर्ने उनले बताए ।

नेकपा एमाले अहिले सरकार बनाउने गिराउने खेलमा नलाग्ने पोखरेलले दावी गरे । “सरकार गिराउन एमालेले पहलकदमी लिदैन”–उनले भने, “एमालेको ध्यान ०८४ को आम निर्वाचनमा ध्यान केन्द्रित गरेको दावी गरे । यस्तै उनले पपुलिष्ट पोलिटिक्सले देशको समस्या समाधान गर्न नसक्ने दावी गरे । पपुलिष्ट पोलिटिक्स बाट जनताको समस्या सम्बोधन गर्न सक्दैन ।

भुटानी शरणार्थी प्रकरणमा दोषि उम्कने खेल सत्तापक्षले सुरु गरेको आरोप लगाएका छन् । पछिल्ला दिनहरुमा हिरासतमा लिइएका अभियुक्तहरुको बयान फेर्नेदेखि सत्तापक्षकै ठूला नेताहरुको नाम जोडिन थालेपछि मुख्य दोषि उम्काउने खेल सुरु भएको दाबी गरे । महासचिव पोखरेलले शरणार्थी प्रकरण घटना राष्ट्रघात भएको भन्दै निष्पक्ष छानविन हुनुपर्ने बताए । “दोषी उम्कनु भएन । निर्दोष फस्नु भएन । घटनासंग जोडिएकाहरु संग निष्पक्ष छानवीन हुनुपर्छ”– उनले भने, “आर्थिक अपचलन संग जोडिएका सबै घटना छानबिन हुनुपर्छ । राज्यद्रोहका कुनै पनि घटना नयाँ पुराना भन्ने हँुदैन ।”