खोज

बुटवल, ४ जेठ ।

व्यावसायिक घराना आईएमई ग्रुपको नेतृत्वमा बनेको बुटवलको लुम्बिनी केबलकार जेठ दोस्रो सातादेखि सञ्चालनमा आउने भएको छ । लुम्बिनी प्रदेशको पहिलो यो केबलकारको सञ्चालनले प्रदेश राजधानी बुटवलबाट दाङ सर्दा रुपन्देहीको ब्यापार व्यवसायमा परेको क्षतिलाई पुर्ति गर्नसक्ने अपेक्षा नीजि क्षेत्रको छ । बुटवलको गोलपार्क बमघाटदेखि पाल्पाको तिनाउ गाउंपालिका–३ बसन्तपुरसम्म ३ किलोमिटर दुरीको लुम्बिनी केबलकार आन्तरिक र वाह्य पर्यटक आकर्षित गर्ने यस क्षेत्रको लागि नौलो हो ।

लुम्बिनी केबलकार प्रालिका अनुसार जेठ १५ भित्र नै केबलकार सञ्चालनमा आउने छ । जेठ १२ गतेदेखि केबलकारको टप स्टेशनमा बनेको कामाख्या मन्दिरमा एक हप्तासम्म भारत गुहावटीबाट आउने पण्डितहरुबाट पुजाआजा गर्ने कार्यक्रम रहेको कम्पनीले जनाएको छ ।

२०७७ फागुन १ गते एक वर्षभित्र सञ्चालनमा ल्याउने घोषणा सहित शिलान्यास भएको केबलकार कोरोना महामारीको असर लगायत कारणले एक वर्ष पछि सञ्चालनमा आउन लागेको हो । आयोजनाको कुल लागत ५ अर्ब रुपैयाँ छ । पहिलो चरणमा केबलकारमा डेढ अर्ब लगानी भएको छ ।

बुटवल उपमहानगरपालिका–३ बमघाटमा बटम स्टेशन र पाल्पाको तिनाउ गाउँपालिका–३ वसन्तपुरमा केबलकारको टप स्टेशन छ ।
मोनोकेवल डिट्याचेबल सिस्टमका २५ वटा गोण्डाला (यात्रु बोक्ने डिब्बा) रहेको केबलकारले दैनिक ६ हजार यात्रुलाई ओसारपसार गर्न सक्ने छ ।

बटम स्टेसन समुद्री सतहबाट दुई सय ३० मिटर र टप स्टेसन नौ सय ४० मिटरको उचाईमा हरेकाले १० मिनेटको यात्रामै तराई, पहाड तथा हिमालको अनुभव तथा दृश्यावलोकन गर्न सकिने भएकाले पनि केबलकार सञ्चालन पछि यस क्षेत्रमा पर्यटकीय चहलपहल बढ्ने अपेक्षा गरिएको प्रालिका अध्यक्ष चन्द्रप्रसाद ढकालले बताए ।

भारतीय सीमाबाट नजिक भएकाले गर्मी मौसममा शितलताका लागि र जाडो मौसममा न्यानोका लागि भारतको गोरखपुर, लखनउसम्मका पर्यटक आकर्षित हुने विश्वास रहेको अध्यक्ष ढकालले बताए ।

अध्यक्ष ढकालले बुटवल–पाल्पा क्षेत्रलाई नेपालको एक ऐतिहासिक तथा पर्यटकीय संगमस्थल सहितको गन्तव्यका रुपमा विकास गर्ने प्रयत्न स्वरुप केबलकारमा लगानी गरेको बताए । लुम्बिनी केबलकारको सञ्चालनले बुटवलबाट प्रदेशको राजधानी दाङ सर्दा व्यवसायीले बेहोर्नुपरेको क्षति पुर्ति गर्ने र देशको अर्थतन्त्रका साथै स्थानीयको जीवनस्तर उकास्न पनि उत्तिकै योगदान गर्ने विश्वास लिएको अध्यक्ष ढकालले बताए ।

केबलकार सञ्चालनमा आएसंगै टप स्टेशनमा साढे ३ अर्ब लागतमा पांचतारे होटेल, बाल उद्यान, धार्मिक स्थल,जिपलाइन लगायत संरचना निर्माण हुने केबलकारका आयोजना प्रमुख गोकुल साउदले बताए ।

लुम्बिनी केबलकार र र कामाख्या मन्दिरले बुटवलमा विल्कुलै नयां धार्मिक पर्यटकीय गन्तव्य थप्ने साउदले बताए । नाट्टा लुम्बिनीकी अध्यक्ष पर्यटन व्यवसायी रचना पन्तले लुम्बिनी केबलकार संगै सिद्धार्थ केबलकार पनि सञ्चालनमा आउंदा बुटवलको व्यवसायिक प्रवद्र्धन र पर्यटन विकासमा ठूलो योगदान पुग्ने बताइन् ।

‘केबलकार संचालनपछि दैनिक ५ हजार जना सेवाग्राही (पर्यटक) थपिंदा बुटवलका होटेल, रेष्टुरेन्ट लगायत सबैखाले व्यवसायमा पक्कै पनि सकारात्मक प्रभाव पर्नेछ’– पन्तले भनिन्–‘प्रदेशको राजधानी बुटवलबाट दाङ सर्दा ब्यापार व्यवसाय क्षेत्रमा परेको असर कम गरी बुटवललाई फेरि गुल्जार बनाउन केवलकार बरदान बन्न सक्छन् ।’ पर्यटकलाई एकरात बुटवलमा बास र वरपरको दृश्यावलोकन गराउने एकीकृत योजना पर्यटन व्यवसायीले बनाउनुपर्ने उनले बताइन् ।

समृद्ध बुटवल र खुशी बुटवलवासी बनाउन केबलकार योजना बरदान सावित हुन सक्ने भएकाले बुटवल उपमहानगरपालिकाले पनि यसमा सहकार्य र प्रबद्र्धनमा लाग्नुपर्ने पन्तको सुझाव छ ।

रुपन्देही नागरिक समाजका अध्यक्ष इश्वरी चापागाईले बुटवलका होटेल काठमाडौं भन्दा महंगा तर गुणस्तर, सुविधा र सत्कारमा कमजोर भएकाले त्यसमा सुधार गरी आन्तरिक र वाह्य पर्यटकको मन जित्न सक्नुपर्ने सुझाव दिन्छन् ।

उद्योग ब्यापार संघ बुटवलका अध्यक्ष गोबिन्दराज गैरेले बुटवलमा सञ्चालन हुन लागेका दुई वटा केबलकारले बुटवलले प्रदेश राजधानी गुमाएको क्षति पुर्ति गर्न सक्ने तर बुटवलको व्यवसाय प्रवद्र्धन र पर्यटन विकासमा व्यवसायीहरु पनि इमान्दार बन्नुपर्ने र सुध्रिनु पर्ने खांचो औंल्याउंछन् ।

‘व्यवसाय प्रवद्र्धनका लागि व्यापारी–व्यवसायीहरु,बैंक र घरधनीहरु पनि इमान्दार बन्नुपर्छ, अरुलाई यो भएन र त्यो भएन भनेर दोष दिने तर आफूले गर्न नहुने काम पनि गर्न तयार हुने परिपाटीले समस्या भएको छ’– अध्यक्ष गैरेले भने–‘बैंक ब्याज दर एकल अंकमा झर्नुप¥यो, व्यवसायी पनि इमान्दार हुनुप¥यो र घर धनीहरुले वैज्ञानिक भाडादर लागु गर्नुप¥यो ।’