खोज

कपिलवस्तु, २ जेठ ।
कपिलवस्तुको मायादेवी गाउँपालिकाका २१ जना किशोरीलाई तिन महिने सिलाई कटाईको तालिम दिई सिलाई मेसिन प्रदान गरिएको छ । कतार च्यारिटीको स्पोन्सरसिपमा किशोरीको सिप बिकास गरि आयआर्जनको गतिबिधीमा सरिक गराउने उद्देश्यका साथ लुम्बिनी एकीकृत बिकास संस्था (लिडो नेपाल) ले सिप सिकेका किशोरीलाई मेसिन सहितको सामग्री हस्तान्तरण गरेको हो ।
मेसिन प्रदान गर्नु पुर्व गाउँपालिकाको वडा नम्बर ८ बिजुवामा १० जना र वडा नम्बर ५ बलुहवामा ११ जना गरि २१ किशोरीका लागी तिन महिने सिलाई कटाई तालिम दिईएको थियो । वडा नम्बर ५ र ८ मा आयोजित तालिम समापन तथा मेसिन हस्तान्तरण कार्यक्रममा मायादेवी गाउँपालिकाका अध्यक्ष वलिउद्दिन मुसलमान, वडा नम्बर ८ का अध्यक्ष मुस्ताक अहमद मुसलमान, लिडो नेपालका सदस्य ओम प्रकाश गुप्ता, वडा नम्बर ५ का अध्यक्ष राधबेन्द्र प्रसाद पाण्डेय, वडा नम्बर ५ का सदस्य अजय कुमार तिवारी, लिडोकी कार्यकारी निर्देशक सुनिता बेल्बासे र कार्यक्रम संयोजक रामनरेश चौधरी लगायतले सिलाई मेसिन हस्तान्तरण गरेका हुन ।

सिलाई कटाई सिक्ने किशोरीका लागी संस्थाले तालिम अबधिसम्म मेसिन र कपडा, स्केल, कैचीं, धागो लगायतका तालिम सामग्री उपलब्ध गराएको थियो ।
तालिममा सहभागी मायादेवी २ मनखोरियाकी पुष्पा कुमारी चौधरीले सिलाई कटाईको सिप सगैँ मेसिन पनि पाएकोमा खुसी व्यक्त गर्दै आफूले सोहि सिप प्रयोग गरि आयआर्जन र आत्मनिर्भर हुन लाग्ने बताईन । त्यस्तै वडा नम्बर ४ पिपरा कि सहभागी हबिबा खातुनले तालिमले आफूहरूलाई दक्ष र सक्षम बनाएको बताईन । तालिममा सहभागीले घरायसी कपडाका काम मात्रै नभई सो सिप प्रयोग गरेर आयआर्जन गर्न सक्षम भएको प्रशिक्षक तहसिन शेखको बुझाई थियो । किशोरीले तालिमबाट पाएको सिपबाट थप दक्षता हासिल गर्नेमा बिस्वस्त रहेको कार्यक्रम संयोजक रामनरेश चौधरीले बताए । किशोरीलाई आत्मनिर्भर र सक्षम बनाउन तालिम र मेसिन हस्तान्तरण कार्यले भूमिका खेल्ने संस्थाकी कार्यकारी निर्देशक सुनिता बेल्बासेको भनाई छ । किशोरीका लागि संस्थाले सञ्चालन गरेको तालिम प्रभावकारी देखिएको गाउँपालिका अध्यक्ष वलिउद्दिन मुसलमानले बताए । गाउँपालिकाले किशोरी शिक्षा, स्वरोजगार र आयआर्जनको कार्यलाई प्राथमिकतामा राखेको उनको स्पष्टोक्ति थियो ।