खोज

चन्द्रौटा(कपिलवस्तु), २५ वैशाख ।

कपिलवस्तुको चन्द्रौटाबाट जग्गा किर्ते तथा जालसाझी गरेको आरोपमा दुईजना पक्राउ परेका छन् । शिवराज नगरपालिका वडा नम्बर–११, थुनिया बस्ने कानुन तथा लेखापढी व्यवसायी समिति इकाई चन्द्रौटाका अध्यक्ष राम निवास कुर्मी चौधरी र उनका सहयोगी राम प्रताप यादव पक्राउ परेका प्रहरीले जनाएको छ ।

वडा प्रहरी कार्यालय चन्द्रौटाका अनुसार अध्यक्ष कुर्मी र उनका सहयोगी यादवले साविक विरपुर गाविस वडा नम्बर–९ का मुकेश यादवको नाममा रहेको जग्गा जग्गाधनी यादवलाई जानकारी नगराई नक्कली राजीनामा बनाएर ठगी गरेको आरोपमा बिहीबार पक्राउ गरिएको छ ।

चौधरीले पीडित रेखा लोहारलाई जग्गा पास भएको भन्दै दुई दिनमा जग्गाधनी पुर्जा उपलब्ध गराउने बताएका थिए । कार्यालय समय सकिएकाले दुई दिनमा आफै पुर्जा लिएर आउने बताएका चौधरीले चार दिन बित्दा समेत पुर्जा नआएपछि आफु ठगिएको अनुभव भएको बताईन् ।

पीडित लोहारले आफू ठगिएको थाहा पाएपछि वडा प्रहरी कार्यालय चन्द्रौटामा उजुरी दिएकी थिईन् । उजुरीपछि वडा प्रहरी कार्यालय चन्द्रौटाले चौधरी र यादवलाई पक्राउ गरेको हो । प्रहरीले मालपोत कार्यालय चन्द्रौटालाई पत्र पठाई राजीनामा स्वीकृत गर्ने अधिकारी हस्ताक्षरको वास्तविक जग्गाको श्रेस्ताको विवरण झिकाएको थियो ।

जिल्लाको कृष्णनगर नगरपालिका–११, बस्ने लोहारलाई जग्गा धनी मुकेश यादवको जग्गालाई जानकारी नगराई राजिनामा तयार गरेर रकम असुल गरेका जनाइएको छ । आरोपी कुर्मी चौधरीले पीडित लोहारलाई मालपोत कार्यलय चन्द्रौटामा लगेर जग्गाको मोठ भिडाएको नाटक गरी नक्कली राजीनामा तयार गरेका थिए ।

मालपोत कार्यालय चन्द्रौटाका प्रमुख लक्ष्मण प्रसाद चालिसेले जवाफमा मालपोतका अधिकारीको हस्ताक्षर नभएको उक्त जग्गाको किर्ते तथा जालसाझी गरी राजीनामा तयार गरिएकाले कानुनी कारवाहीको लागि पत्राचार गरिएको बताए । नियतबस गल्ती गर्ने जो सुकै भएपनि कानुन अनुसार कारबाही हुनुपर्ने उनको भनाई छ । पक्राउ परेका उनीहरूलाई थप अनुसन्धानका लागि म्याद थप गरी जिल्ला अदालत कपिलवस्तु लगिएको जनाइएको छ । यता कानुन तथा लेखापढी व्यवसायी समिति इकाई चन्द्रौटाका उपाध्यक्ष सन्तोष चौधरीले यसबारे आफूलाई जानकारी नभएको बताए । अनुसन्धान भइरहेकोले बुझेपछि थप जानकारी गराउने उनले बताए ।