खोज

सल्यान (बुटवलटुडे),२० बैशाख । – सामाजिक सुरक्षा वितरणलाई पारदर्शी बनाउन बैंक पुगेका स्थानीय तहमा अनिवार्य बैंकिङ प्रणालीबाट सामाजिक सुरक्षा भत्ता वितरण गर्नुपर्ने व्यवस्था छ । तर भौगोलिक विकटता, शारिरिक अशक्तता लगाएतका कारण घरबाट निकै टाढा रहेको बैंक सम्म पुगी लामो समय सम्म लाईनमा बसेर भत्ता बुझ्न लाभग्राहीलाई समस्या हुने गरेको छ । उनीहरुको घर आँगणमै अथवा आफ्नै वडामा भत्ता बुझ्ने चाहना हुन्छ । यसै विषयलाई मध्यनजर गरेर जिल्लाको बनगाड कुपिण्डे नगरपालिकाले वडाबाटै सामाजिक सुरक्षा बापतको रकम वितरण गर्ने प्रवन्ध मिलाएको छ ।
वडाबाटै भत्ता पाउन थालेपछि ज्येष्ठ नागरिक तथा अपांगता भएका नागरिक उत्साहित भएका छन् । पालिकाका धेरै वडा विकट र दुर्गममा रहेको हुँदा बैंकमा भत्ता लिन जान निकै कठिन भएपछि वडाबाटै भत्ता वितरण गर्न थालिएको नगरपालिकाले जनाएको छ । बनगाड कुपिण्डे नगरपालिका २ की पानसरी महतराले चालु आर्थिक वर्षको दोस्रो चौमासिकको भत्ता वडाबाटै प्राप्त गरेकि छिन् । विगतमा बैंकमा घण्टौँसम्म लाइन बसेर वृद्ध भत्ता बुझ्दै आएकी उनी अव भने खुसी छिन् ।
टाढाका ज्येष्ठ नागरिक तथा अपांगता भएका नागरिकलाई बैंकसम्म पुग्न समस्या भएपछि बैंकहरूको समन्वयमा वडाबाटै सामाजिक सुरक्षा भत्ता वितरण सुरु गरिएको नगरप्रमुख कर्ण बहादुर बुढाथोकीले जनाए । निर्वाचनको समयमा मतदातासँग गरिएको प्रतिबद्धता अनुसार सामाजिक सुरक्षा भत्ता बैंकमा आएर लाइनमा बसी लिनु पर्ने बाध्यताको अन्त्य भएको उनको भनाई छ । पालिकाका १२ वटै वडाबाट सामाजिक सुरक्षा भत्ता वितरण गरिने बुढाथोकीले जानकारी दिए ।
स्थानीय लाभग्राही राम प्रसाद शर्माले पहिले सल्लीबजारमा रहेको बैंकमा भत्ता लिन जाँदा धेरै दुःख पाएको सुनाउदै अहिले बाटो छोट्टिएको जनाए । वडा कार्यालयसम्म आइपुगेर भत्ता पाउँदा धेरै सहज भएको उनको भनाई छ ।