खोज

कपिलवस्तु,  बैशाख । सशस्त्र प्रहरी बल बोर्डर आउट पोष्ट हर्दौनाको नवनिर्मित अफिस र ब्यारेक भवनको उद्घाटन गरिएको छ । शसस्त्र प्रहरी बल नेपाल नम्बर ५ बिन्धबासिनी बाहिनी मुख्यालय रूपन्देहीका बाहिनीपति शसस्त्र प्रहरी नायब महानिरिक्षक बिदुर खड्काले भवनको उद्घाटन गरेका हुन ।
महाराजगंज नगरपालिका वडा नम्बर १० हर्दौनामा २०७६ फागुन २१ गते हर्दौना छोटी भंसार कार्यालयको जग्गामा स्थापना भएको बिओपीको नयाँ भवन उदघाटन भएको हो । अफिस र ब्यारेक गरिको संरचना निर्माणको कार्य ओम सत्य साई कन्ट्रसन प्रा.लि. चितवनले ८३ लाख ८८ हजार ९ सय ३ रूपैयामा पुरा गरेको थियो । बिओपी भवन उद्घाटन कार्यक्रममा बोल्दै महाराजगंज नगरपालिकाका प्रमुख अब्दुल कलाम खाँले हर्दौना क्षेत्र बाणगंगा नदीको डुबान, बाढि र आगलागी जस्ता प्रकोप क्षेत्र भएकोले सो स्थानमा बिओपीको स्थापनाले नागरिकलाई राहत मिलेको बताए । कोरोनाका बेला सशस्त्र प्रहरी सहितका सुरक्षा निकायको समन्वयमा सिमामा आएका नागरिकलाई सहयोग गरेको स्मरण गर्दै प्रमुख खाँले सशस्त्र प्रहरीको भूमिकाको प्रशंसा गरे । आफूहरूले बिगतमा बिओपी स्थापनका बेला छोटी भंसारको पुरानो संरचना व्यवस्थापन गर्न सशस्त्र प्रहरीलाई सहयोग गरेको उनले स्मरण गराए ।
भवन उदघाटन कार्यक्रममा सहभागी वडा नम्बर १० का अध्यक्ष शैलेन्द्र कुमार चौधरी, वडा नम्बर ८ का अध्यक्ष योगेन्द्र कुमार केसी लगायतले सशस्त्र प्रहरीको उपस्थितीले सो क्षेत्रका नागरिकलाई शान्ति सुरक्षा र बिपतका बेला राहत मिलेको बताए ।

हर्दौना बिओपीले नेपाल भारत सिमा क्षेत्रको ५ किलोमिटरको दुरी निगरानी गर्दै आएको छ । प्रस्तावित सिमा सुरक्षा गुल्म मातहत र नम्बर २८ गण हेडक्वाटरको ओभरअल कमाण्डमा सो बिओपीले कार्य सम्पादन गर्दै आएको शसस्त्र प्रहरी वल नम्बर २८ गणका गणपति सशस्त्र प्रहरी उपरिक्षक जिवन केसीले बताए । सिमा सुरक्षा मजबुत नभई शान्ति सुरक्षा सबल हुन नसक्ने शसस्त्र प्रहरी बल नेपाल नम्बर ५ बिन्धबासिनी बाहिनी मुख्यालय रूपन्देहीका बाहिनीपति शसस्त्र प्रहरी नायब महानिरिक्षक बिदुर खड्काले बताए । सिमा अतिक्रमण, सिमा स्तम्भको सुरक्षा, सिमापार अपराध नियन्त्रण, लागु औषध ओसार पसार, मानव बेचबिखन नियन्त्रण, हतियार तथा बिष्पोठक पदार्थ नियन्त्रण, अबैध चोरी पैठारी नियन्त्रण, हत्या हिंसा रोकथामका लागी सरकारको निती अनुसार बर्डर आउट पोष्ट थपिन थालेको उनले जानकारी दिए । शसस्त्र प्रहरीलाई नागरिक सँग हातेमालो गरेर सिमा सुरक्षाका कार्य अगाडी बढाउन नायब महानिरिक्षक खड्काले निर्देशन दिए ।