खोज

सल्यान, १८ बैशाख ।

यस बर्षका सार्वजनिक बिदाका दिनहरुमा पनि जिल्ला प्रशासन कार्यालय सल्यानबाट सेवा प्रवाह हुने भएको छ । सार्वजनिक विदाको दिनमा पनि नागरिकता, राहदानी राष्ट्रिय परिचयपत्र वितरण तथा पञ्जिकरण सम्वन्धी सेवा प्रवाह हुने प्रशासनले एक सूचना जारी गर्दै जानकारी गराएको हो ।

गृह मन्त्रालयको निर्णय अनुसार २०८० साल वैशाख १ गते देखि चैत मसान्तसम्म विदाको दिनमा पनि सार्वजनिक सेवा नियमित रुपमा प्रवाह गर्ने व्यवस्था अनुरुप सार्वजनिक विदाको दिनमा पनि सेवाग्राहीका लागि प्रशासन कार्यालय खुल्ला रहने प्रमुख जिल्ला अधिकारी वेद प्रसाद खरेल जानकारी दिए । सेवाग्राहीको हितलाई ध्यानमा राखी प्रशासनले विभिन्न चाडपर्व र दिवसमा दिँदै आएको विदामा पनि सेवा प्रवाह गर्ने भएको हो ।

कार्यालयका अनुसार २०८० सालमा पर्ने उभौली, चण्डि पूर्णिमा, बुद्ध जयन्ती, गणतन्त्र दिवस, रक्षाबन्धन, कृष्ण जन्माष्टमी, घटस्थापना, क्रिशमस डे, उधौली, धान्य पूर्णिमा, योमरी पुन्ही, तमु ल्होसार, पृथ्वी जयन्ती, माघी, सोनाम ल्होसार, जनयुद्ध दिवस, प्रजातन्त्र दिवस, महाशिवरात्री, अन्तर्राष्ट्रिय महिला दिवस, ग्याल्बो ल्होसार, इद उल फित्र र इद उल अजहा लगायतका चाडपर्व र दिवसहरुमा पनि प्रशासन कार्यालय खुला रहने र सेवाप्रवाह हुने छ ।