खोज

बुटवल, १३ बैशाख ।

रुपन्देहीबाट गत मंसिरमा भएको संसदीय निर्वाचनमा स्वतन्त्र उम्मेदवारी दिएका  विभिन्न १६ जना उम्मेदवारलेआफ्नो निर्वाचन खर्च विवरण सार्वजनिक गरेका छन् ।

मंसिर ४ गते सम्पन्न संघ र प्रदेशसभा निर्वाचनमा स्वतन्त्र उम्मेदवारी दिएकाहरुले निर्वाचन आयोगमा बुझाएको आफ्नो चुनावी खर्च विवरण सार्वजनिक गरेका हुन् । रुपन्देही–२ बाट प्रतिनिधिसभा सदस्यका लागि त्रिभुज चिन्ह लिएर उम्मेदवार बनेका विष्णु बिकेले निर्वाचनमा आफ्नो ८० हजार रुपियाँ खर्च भएको विवरण सार्वजनिक गरेका छन् ।

त्यस्तै प्रतिनिधि सभाका अन्य उम्मेदवारहरु प्रदिप ज्ञवालीले ७६ हजार, सुरेन्द्र भारीले ६४ हजार र तोपनारायण पौडेलले ६८ हजार खर्च भएको विवरण सार्वजनिक गरेका छन् ।

त्यस्तै रुपन्देही क्षेत्र नम्बर २ अन्तर्गत प्रदेशसभा १ मा उम्मेदवारी दिएका इश्वरीप्रसाद भण्डारीले ४६ हजार, प्रदेशसभा २ (१) मै उम्मेदवारी दिएका उमाकान्त सापकोटाले ४६ हजार, र सोही क्षेत्रबाट उम्मेदवारी दिएका अर्का उम्मेदवार डोमबहादुर गुरुङले ४६ हजार, प्रदेशसभा २ (२) बाट उम्मेदवारी दिएका जिवनारायण घिमिरेले ५८ हजार र सोही क्षेत्रबाट उम्मेदवारी दिएका चामबहादुर क्षेत्रीले ५९ हजार खर्च भएको विवरण सार्वजनिक गरेका छन् ।

त्यसैगरी रुपन्देही क्षेत्र नम्बर १ अन्तर्गत प्रदेशसभा २ बाट स्वतन्त्र उम्मेदवारी दिएका शंकर भुसालले पनि आफ्नो निर्वाचन खर्च सार्वजनिक गरेका छन् । निर्वाचन आयोगमा बुझाएको विवरण अनुसार उनले निर्वाचनमा आफ्नो १९ हजार खर्च भएको बताएका छन् । त्यस्तै रुपन्देही क्षेत्र नम्बर १ को प्रदेशसभा २ बाटै उम्मेदवारी दिएका दिपक खनालले आफ्नो ८ हजार ५०० रुपियाँ मात्र निर्वाचनमा खर्च भएको उल्लेख गरेका छन् ।

त्यस्तै रुपन्देही क्षेत्र नम्बर ५ बाट उम्मेदवारी दिएका स्वतन्त्र उम्मेदवारहरुले पनि आफ्नो चुनावी खर्च विवरण सार्वजनिक गरेका छन् । क्षेत्र नम्बर ५ बाट स्वतन्त्र उम्मेदवारी दिएका केशवराज पौडेलले आफ्नो खर्च २५ हजार रुपियाँ भएको उल्लेख गरेका छन् । त्यसैगरी क्षेत्र नम्बर ५ प्रदेशसभा १ मा स्वतन्त्र उम्मेदवारी दिएका भिमलाल सुवेदीले निर्वाचनमा आफ्नो २० हजार रुपियाँ खर्च भएको विवरण सार्वजनिक गरेका छन् । क्षेत्र नम्बर ५ बाटै प्रतिनिधिसभामा उम्मेदवारी दिएका गोविन्दप्रसाद पाण्डेले आफ्नो चुनावी खर्च ३९ हजार ५०० भएको उल्लेख गरेका छन् । त्यस्तै प्रतिनिधिसभाकै उम्मेदवार भानुभक्त भण्डारीले आफ्नो चुनावी खर्च २५ हजार रुपियाँ भएको विवरण सार्वजनिक गरेका छन् भने रामप्रसाद घिमिरेले ३५ हजार ८०० रुपियाँ चुनावमा खर्च भएको विवरण आयोगमा पेश गरेका छन् ।

निर्वाचनमा स्वतन्त्र उम्मेदवारी दिएका ती सबै पराजित भएका थिए । उनीहरुले बुधबार सञ्चारकर्मीमाझ खर्च विवरण सार्वजनिक गरेका हुन् ।