खोज

गुल्मी (बुटवलटुडे), १९ फागुन– अस्पतालमा खानेपानीको अभाव भएको छ । सदरमुकाम तम्घासस्थित जिल्लाकै ठूलो अस्पतालमा खानेपानीको अभाव भएपछि अस्पतालमा थप समस्या उत्पन्न भएको हो । रेसुङ्गा नगरपालिका ८ अन्तर्गत रहेको दोबिन्दा खोलाको मुलबाट ल्याउने गरेको मुहानमा सुख्खायाममा पानी सुक्दै गएपछि अस्पतालमा खानेपानीको अभाव भएको अस्पताल बिकास समितिका अध्यक्ष भरत पाण्डेले बताए ।
अस्पतालमा पानीको अभाव हुँदा बिरामी र कर्मचारीहरूदेखि ल्याव सञ्चालनमा प्रयोग हुने उपकरणहरूमा पनि समस्या उत्पन्न भएको पाण्डेले पाण्डेले बताएका छन । अस्पताल विकास समितिका अध्यक्ष पाण्डेले आफू अस्पताल बिकास समितिको अध्यक्ष भैसकेपछि दीर्घकालिन रूपमा खानेपानीको समस्यालाई समाधान गर्न पहल गरेपनि एक्लो प्रयासले मात्र समस्याको समाधान नभएको उनको गुनासो थियोे ।

अस्पताल जस्तो संबेदनशील क्षेत्रमा पानीको समस्यावाट सेवा प्रवाहमा कुनै समस्या नपरोस भनेर नगरपालिकाले पानीको समस्या समाधानका गर्न स्रोत व्यवस्थापनका लागि पहल गरिरहेको रेसुङ्गा नगरपालिका प्रमुख खिलध्वज पन्थीले बताए । उनले तत्कालै उक्त समस्या समाधान गर्न सोही वडाका वडाध्यक्षलाई निर्देशन दिएको र आफु पनि खानेपानीको दीर्घकालिन समस्या समाधानका लागि लागिपरेको जानकारी दिए । ‘अस्पताल भनेको अति संवेदनशील क्षेत्र हो, पानीको अभावमा समस्या उत्पन्न हुन दिंदैनौ त्यसका लागि नगरपालिकाले जुनसुकै माध्यमवाट पनि समस्या समाधानमा लाग्छ’ नगर प्रमुख पन्थीले भने ।
कतिपय खानेपानी उपभोक्ता समितिको स्थायी लेखा नम्वर नहुँदा भुक्तानी प्रक्रियामा समस्या हुने भएका कारण पानीको मिटर जडान गर्न थप समस्या भएको अध्यक्ष पाण्डेले बताए । जिल्ला सदरमुकाममा रहेका उपभोक्ता समितिहरूसँग आफूले समस्याको समाधानका लागि पहल गरेपनि बृहत खानेपानी उपभोक्ता समिति बाहेक अन्य समितिहरू सकारात्मक नभएको पाण्डेले गुनासो गरेका छन ।

खानेपानी उपभोक्ता समितिहरूले भने अस्पताललाई खानेपानी उपलब्ध गराउने कुरामा समितिमा कुनै विमती नरहेको भन्दै संस्थाले तोकेको न्यूनतम शुल्क बुझाएर प्रक्रियामा गएमा तत्कालै पानीको मिटर जडान गर्नमा कुनै समस्या नभएको बताएका छन । गुल्मी अस्पतालमा दैनिक तीन सयदेखि चार सय जना बिरामीहरूले सेवालिँदै आईरहेका छन ।