सामग्री खोज्नुहोस्

अर्घाखाँची । 

लुम्बिनी प्रदेशको पहाडी जिल्ला अर्घाखाँचीमा क्रिकेट खेलको विकास, खेलाडीको प्रतिभा प्रस्फुटन र खेलकुदप्रतिको आकर्षण बढाउने उद्देश्यसहित खुला क्रिकेट प्रतियोगिता आयोजना हुने भएको छ । स्वर्गीय रमा देवीको स्मृतिमा उनको परिवारले ‘लेट रमा देवी मेमोरियल टी–१० क्रिकेट कप’ आयोजना गर्न लागेको हो ।

प्रतियोगिता यहीँ  असोज २७ गतेदेखि सन्धिखर्कको टुडीखेलमा सञ्चालन हुने आयोजक परिवारका शोभाखर खत्रीले बताएका छन् ।

प्रतियोगिताको विजेता टोलीले एक लाख रुपैयाँ नगद पुरस्कार प्राप्त गर्नेछ भने उपविजेता टोलीले ६० हजार रुपैयाँ पाउनेछ । यसका साथै प्रतियोगितामा उत्कृष्ट प्रदर्शन गर्ने खेलाडीलाई पनि आकर्षक पुरस्कारको व्यवस्था गरिएको छ ।

प्रतियोगितामा उत्कृष्ट खेलाडी अर्थात् म्यान अफ द सिरिजलाई १५ हजार रुपैयाँ प्रदान गरिनेछ। त्यसै गरी उत्कृष्ट ब्याट्सम्यान र उत्कृष्ट बलरले जनही पाँच हजार रुपैयाँ प्राप्त गर्नेछन् । प्रत्येक खेलका उत्कृष्ट खेलाडी अर्थात् ‘म्यान अफ द म्याच’लाई दुई हजार एक सय रुपैयाँ पुरस्कार प्रदान गरिने आयोजकले जनाएको छ ।

स्वर्गीय रमा देवीको स्मृतिलाई जीवन्त राख्दै खेलकुदमार्फत युवालाई सकारात्मक गतिविधिमा जोड्ने उद्देश्यले आयोजना गर्न लागिएको यस प्रतियोगिताले जिल्लाको क्रिकेट विकासमा योगदान पुर्‍याउने अपेक्षा गरिएको छ ।

खेलकुद प्रतियोगितालाई मनोरञ्जनको माध्यममा मात्र सीमित नराखी युवाको प्रतिभा पहिचान, आपसी सद्भाव अभिवृद्धि र स्थानीय स्तरमा क्रिकेटको प्रवर्द्धन गर्ने अवसरका रूपमा समेत हेरिएको छ ।