© 2026
२६ भाद्र २०८३, शुक्रबार
२६ भाद्र २०८३, शुक्रबार
किएभ ।
रुस र युक्रेनबीच भएका पछिल्ला पारस्परिक आक्रमणमा कम्तीमा १० जना घाइते भएका छन् । आक्रमणबाट दुवै देशमा आवासीय भवन तथा नागरिक र औद्योगिक पूर्वाधारमा क्षति पुगेको सम्बन्धित अधिकारीहरूले जनाएका छन् ।
युक्रेनी अधिकारीहरूका अनुसार रुसी हवाई आक्रमणमा किएभस्थित नौतले आवासीय भवनमा क्षति पुग्दा आठ जना घाइते भएका छन् । अमेरिकी राष्ट्रपति डोनाल्ड ट्रम्पका दूतहरूले युद्ध अन्त्य गर्ने प्रयासस्वरूप मस्को र किएभ भ्रमण गरेपछि केही समय रोकिएको रुसी हवाई आक्रमण यसै साता किएभमा पुनः तीव्र भएको छ ।
यसैबीच, रुसी सहर भोल्गोग्राडमा युक्रेनी क्षेप्यास्त्र प्रहारबाट आवासीय भवनमा क्षति पुग्दा दुई जना घाइते भएका छन् । भग्नावशेषका कारण एउटा औद्योगिक सुविधामा समेत क्षति पुगेको स्थानीय अधिकारीहरूले बताएका छन् ।
मध्य रुसको भोल्गा नदी किनारमा रहेको साराटोभ सहरमा युक्रेनी ड्रोन आक्रमणबाट नागरिक पूर्वाधारमा क्षति पुगेको क्षेत्रीय गभर्नर रोमन बुसार्गिनले बताए । रुसी इ–वाणिज्य कम्पनी ओजोनले पनि साराटोभस्थित आफ्नो सामान भण्डारण तथा वितरण केन्द्रमा युक्रेनी ड्रोन आक्रमणपछि आगलागी भएको जनाएको छ ।
सन् २०२२ मा रुसले युक्रेनमाथि आक्रमण गरेपछि सुरु भएको युद्ध अन्त्यका लागि कूटनीतिक प्रयास जारी रहे पनि दुवै पक्षबीच हवाई तथा ड्रोन आक्रमण भने निरन्तर भइरहेका छन् ।
© 2026
All rights reserved.
Design & Developed By:
