सामग्री खोज्नुहोस्

काठमाडौं । भारतको हिमाली राज्य उत्तराखण्डमा निर्माणाधीन सुरुङमा पानी र भग्नावशेषसहित पहिरो खस्दा कम्तीमा सात जना कामदारको मृत्यु भएको छ भने १३ जना घाइते भएका छन्। बिहीबार राति भएको दुर्घटनापछि तीन जना कामदार अझै बेपत्ता रहेको अधिकारीहरूले शुक्रबार बताएका छन्।

राज्यद्वारा सञ्चालित जलविद्युत् परियोजनाका लागि सुरुङ निर्माण भइरहेको स्थानमा दुर्घटना भएको हो। राज्य विपद् व्यवस्थापन प्राधिकरणका अनुसार घटनास्थलबाट १९ जना कामदारको उद्धार गरिएको छ। घाइते १३ जनाको उपचार भइरहेको छ। उद्धारकर्मीहरूले पानी भरिएको सुरुङ क्षेत्रमा पुगेर बेपत्ता कामदारको खोजी गरिरहेका छन्। लगातारको मनसुनी वर्षाका कारण उत्तराखण्डमा पछिल्ला दिनमा बाढी तथा पहिरोको जोखिम बढेको अधिकारीहरूले बताएका छन्। हिमाली भूभागमा सडक, बस्ती तथा निर्माणस्थलसमेत जोखिममा परेका छन्। वातावरणविद्हरूले कमजोर हिमाली भूभागमा अव्यवस्थित तथा अत्यधिक विकास परियोजना सञ्चालन गर्दा प्राकृतिक विपद्को जोखिम बढिरहेको चेतावनी दिँदै आएका छन्।

यसअघि सन् २०२३ मा उत्तराखण्डकै निर्माणाधीन सुरुङमा पहिरो खस्दा ४१ जना कामदार १७ दिनसम्म सुरुङभित्र फसेका थिए। लामो उद्धार अभियानपछि उनीहरूलाई सुरक्षित बाहिर निकालिएको थियो।भारतमा मनसुन सुरु भएयता बाढी र पहिरोका कारण ठूलो जनधनको क्षति भएको छ। विज्ञहरूले अव्यवस्थित विकाससँगै जलवायु परिवर्तनका कारण यस्ता विपद्को आवृत्ति र तीव्रता बढिरहेको बताएका छन्।