सामग्री खोज्नुहोस्

पर्वत । पर्वतमा समानुपातिक निर्वाचनतर्फ मतगणना सम्पन्न भएको छ । आज सम्पन्न अन्तिम मत परिणामअनुसार राष्ट्रिय स्वतन्त्र पार्टीले अन्य दलको तुलनामा दोब्बरभन्दा बढी मत प्राप्त गरेको छ ।

मुख्य निर्वाचन अधिकृतको कार्यालयले दिएको जानकारीअनुसार पर्वतमा राष्ट्रिय स्वतन्त्र पार्टीको घण्टी चिह्नले ३० हजार ७३५ मत पाएको छ । यसै गरी दोस्रोमा नेपाली काँग्रेसले १३ हजार ८७४ र तेस्रोमा नेकपा ९एमाले० ले १३ हजार ३५० मत पाएका छन् । नेपाली कम्युनिस्ट पार्टीले तीन हजार ३८४ मत पाएको छ ।

यसरी नतिजा हेर्दा एमाले, काँग्रेस र नेकपा गरी तीन वटै दलले पाएको मतभन्दा रास्वपा एक्लैले पाएको मत बराबर जस्तै रहेको छ । यसै गरी राष्ट्रिय प्रजातन्त्र पार्टीले एक हजार ४७७ र राष्ट्रिय जनमोर्चाले १२८ मत पाएको छ । पर्वतमा समानुपातिकतर्फ साना ठुला गरी १५ वटा राजनीतिक दललाई मत परेको थियो । अन्य राजनीतिक दलको मत सङ्ख्या १०० भन्दा कम रहेको छ ।

पर्वतमा प्रत्यक्षतर्फ रास्वपाकै उम्मेदवार सागर भुसालले फराकिलो मतान्तरले विजयी भएका थिए । प्रत्यक्षतर्फ खसेको मत र समानुपातिक तर्फको मतमा काँग्रेस दोस्रो, एमाले तेस्रो र नेकपा चौथो तथा राप्रपा पाँचौँ स्थानमा परेका हुन् ।

पर्वतमा यसअघि नेकपा (एमाले) का उम्मेदवार पदम गिरी लगातार दुई पटक विजयी भएका थिए भने त्यसअघि तीन पटकसम्म नेपाली काँग्रेसका उम्मेदवार अर्जुनप्रसाद जोशी विजयी भएका थिए ।

पुराना राजनीतिक दल र पटक पटक दोहोरिएका उम्मेदवारहरूप्रति नागरिकको असन्तुष्टि बढेका कारण विगतका निर्वाचनभन्दा अझै फराकिलो अन्तरले रास्वपा उम्मेदवार भुसाल विजयी हुनुका साथै समानुपातिकतर्फ नयाँ दलले नै बढी मत पाएको हो । पर्वतमा समानुपातिकतर्फ ६६ हजार २८७ मत खसेकोमा एक हजार ६५४ मत बदर भएका हुन् ।

पर्वतका १४ उम्मेदवारको जमानत जफत हुने 

प्रतिनिधिसभा सदस्य निर्वाचन २०८२ अन्तर्गत पर्वतमा सबै मत परिणाम सार्वजनिक भइसकेको छ । अन्तिम मत परिणामअनुसार नेपाली कम्युनिस्ट पार्टीका उम्मेदवारसहित १४ जना उम्मेदवारको जमानत जफत हुने भएको छ । नेपाली कम्युनिस्ट पार्टीका उम्मेदवार मनहरि तिमिल्सिनाले कूल सदर मतको १० प्रतिशत कटाउन नसकेका हुन।

शर्माले चार हजार ५५७ मत ल्याए । जिल्लामा प्रत्यक्षतर्फ कूल ६५ हजार ३७९ मतमध्ये कूल सदर मत ६३ हजार २०३ मतको १० प्रतिशत तिमिल्सिनाले कटाउन सकेनन् । उनले छ हजार ३२० मत ल्याउनुपर्ने थियो । पर्वतमा दुई हजार एक सय ७६ मत बदर भएका थिए । तिमिल्सिनाले  जिल्लामा बाँदर नियन्त्रणदेखि विकास निर्माणको समग्र खाका लिएर मतदाता सामु पुगे जिल्लामा चौथो स्थान प्राप्त गरेका छन् ।

राप्रपा उम्मेदवार दुर्गाबहादुर मल्लले ५२५, नेपाल मजदुर किसान पार्टीकी उम्मेदवार ऐलिना सुवालले सात, नेपाल कम्युनिस्ट पार्टी माओवादीका कृष्णबहादुर विकले ११८, आम जनता पार्टीकी पवित्रा मल्लले पाँच, राष्ट्रिय जनमोर्चाका उम्मेदवार भिमलाल न्यौपानेले ८७ मत पाएका छन् ।

राष्ट्रिय जनमुक्ति पार्टीकी माया पाइजा पुन फकामी मगरले १९ मत, उज्यालो नेपाल पार्टीका उम्मेदवार यामबहादुर चोचांगी पुनले १२२, मङ्गोल नेशनल अर्गनाइजेशन पार्टीकी उम्मेदवार लालकुमारी थापा रानाले ४१, नेशनल रिपब्लिक नेपालका उम्मेदवार वीरबहादुर गुरुङले ९८ मत पाएका छन् ।

स्वतन्त्रबाट उम्मेदवार बनेका सीतादेवी शर्माले आठ, सावित्री शर्माले तीन, मिना पौडेल शर्माले आठ र गङ्गालाल रिमालले पाँच मत पाएका हुन । निर्वाचनमा होमिएका १७ जना उम्मेदवारमध्ये तीन वटा राजनीतिक दलको मात्र जमानत जोगिएको हो ।

पर्वतमा राष्ट्रिय स्वतन्त्र पार्टीका उम्मेदवार सागर भुसालले २६ हजार ५६१ मत प्राप्त गरी विजयी भएका छन् भने दोस्रोमा नेपाली काँग्रेसका उम्मेदवार अर्जुनप्रसाद जोशीले १५ हजार ९५४ र नेकपा (एमाले) का उम्मेदवार पदम गिरीले १५ हजार ७५ मत प्राप्त गरी तेस्रो भएका थिए ।

उम्मेदवारी दर्ताका लागि पुरुषको हकमा रु दश हजार र महिलाको हकमा रु पाँच हजार धरौटी तिर्नुपर्ने प्रावधान रहेको छ । रासस