खोज

बुटवल । बुटवलमा भाेलि शनिबारदेखि सातौँ राष्ट्रपति रनिङ शिल्ड प्रतियोगिता हुने भएको छ । उपमहानगरपालिका नगर खेलकूद बिकास समितिको आयोजनामा भोलिदेखि बुटवल–११, एन्फा टेक्निकल सेन्टरको खेल मैदानमा आयोजना हुने प्रतियोगिताको सम्पूर्ण तयारी पूरा भएको खेलकूद बिकास समितिले जनाएको छ ।

नगर खेलकुद विकास समितिले शुक्रबार पत्रकार सम्मेलन गरी राष्ट्रपति रनिङ शिल्ड प्रतियोगिताकाे तयारीबारे जानकारी गराएको हो।

बुटवलमा हुने यो प्रतियोगितालाई खेलकूद मेलाको रुपमा लिइएको र यहाँबाट विद्यार्थीका उत्कृष्ट प्रतिभाहरु हेर्न सकिने बुटवल उपमहानगरका नगर प्रमुख खेलराज पाण्डेयले बताए। बुटवलकै उत्कृष्ट खेलकूद प्रतियोगिताको रुपमा सम्पन्न गर्न नगर प्रमुख पाण्डेयले निर्देशन समेत दिए।

यो प्रतियोगिताले विद्यार्थीको खेल प्रतिभा उजागर गर्नुका साथै सामूहिक भावना र प्रतिस्पर्धात्मक क्षमताको विकास गर्ने विश्वास लिइएको उनले बताए । खेलकुदको माध्यमबाट विद्यार्थीको शारीरिक तथा मानसिक विकासमा टेवा पुर्याउन प्रतियोगिताले सहयोग पुग्ने उप प्रमुख सावित्रादेवी अर्यालले विश्वास व्यक्त गरिन्।

प्रतियोगितामा बुटवल उपमहानगर अन्तरगत रहेका ४२ वटा सामुदायिक तथा निजी विद्यालयहरुबाट १ हजार ५८८ विद्यार्थीहरुले विभिन्न इभेन्टमा प्रतिस्पर्धा गर्दै छन्।

जस अन्तरगत ९४१ जना छात्रा तथा ६०७ जना छात्रहरुले प्रतिस्पर्धा गर्ने खेलकुद विकास समितिका संयोजक बोनिन पियाले जानकारी गराए।

कूल ३५० उपाधिका लागि प्रतिस्पर्धा हुने प्रतियोगितामा एथ्लेटिक्सतर्फ दौड, ज्याभ्लिङ्ग थ्रो, सटपुट, लङ्ग जम्प, हाई जम्प, त्रिपल लगायत रहेका छन् भने कराँते तर्फ ६ वटा विधा, तेक्वान्दोतर्फ ६ वटा विधामा प्रतिस्पर्धा हुने छ । यसैगरी भलिबल र कबड्डी प्रतियोगिता हुने संयोजक पियाले जानकारी दिए।

प्रतियोगितामा रनिङ शिल्ड विजेता विद्यालयले नगद २५ हजार राशी प्राप्त गर्नेछ भने उपविजेता र तृतीय हुने विद्यालयलाई समेत क्रमशः १५ हजार र १० हजार नगद राशीले सम्मान गरिने संयोजक पियाले बताए।

यसैगरी विधागत तर्फ छात्रा/छात्र भलिबल प्रतियोगितामा बिजेता दुवै समूहलाई नगद १५ हजार, द्वितीय हुने समूहलाई ७ हजार ५ सय कबड्डी तर्फ पनि प्रथम, द्वितीय र तृतीयलाई क्रमशः १५ हजार ७ हजार ५ सय र ३ हजार ५ सय नगद राशी प्रदान गरिने बताइएको छ।

एकल प्रतिस्पर्धातर्फ कराँते र तेक्वान्दोमा प्रथम, द्वितीय र तृतीय हुनेलाई जनही क्रमशः २ हजार १ हजार ५ सय र १ हजार रुपैयाँ नगद प्रदान गरिने भएको छ।

प्रतियोगितामा सहभागी विद्यार्थीका लागि खेल अवधिमा हुन सक्ने दुर्घटनालाई मध्यनजर गरी दुर्घटना बीमाको समेत व्यवस्था गरिएको खेलकुद समितिले जानकारी गराएको छ।