खोज

गुल्मी,७ पुस ।

धार्मिक तथा पर्यटकीय क्षेत्र रेसुङ्गामा रहेको गर्जुरा पार्कमा  पाँच महिनाको अवधिमा १२ हजार बढीले अवलोकन गरेका छन् ।

रेसुङ्गा नगरपालिकाका सूचना प्रविधि अधिकृत सुरेश खनालका अनुसार यस आर्थिक वर्षको सुरुदेखि मङ्सिरसम्म १२ हजार एक सय जनाले रेसुङ्गा  क्षेत्रमा रहेको गर्जुरा पार्कको अवलोकन गरेका छन् ।

नगरले स्थापना गरेको पर्यटन सूचना केन्द्रको अभिलेख अनुसार राजनीतिक दल, राष्ट्रिय स्तरका कलाकार, पत्रकार,व्यवसायी, धर्म तथा पर्यटनमा रुचि राख्ने धार्मिक तिर्थालु, आन्तरिक पर्यटक गरी कुल १२ हजार एक सयले यस क्षेत्रको अवलोकन गरेको तथ्याङ्कमा उल्लेख छ ।

नगरप्रमुख खिलध्वज पन्थीले नगरले सञ्चालन गरेको जाँउ हिँड रेसुङ्गा अभियान प्रभावकारी भएको बताउँदै यस अभियानलाई निरन्तरता दिएको बताएका छन् ।
नगरले सञ्चालन गरेको जाँउ हिँड रेसुङ्गा अभियानले गर्जुरा पार्क,अर्जुन क्षेत्र, उनायचौरको ट्रि हाउस,धुर्कोको विचित्र गुफा, भुवाने पार्क ,तम्घास थान मन्दिरमा चहलपहल बढेको बताउँदै आर्थिक गतिविधिहरू पनि चलायमान भएको उनको दाबी छ ।

पार्कबाट यस आर्थिक वर्षको हालसम्म चार लाख ५५ हजार राजस्व सङ्कलन भएको छ । पार्क अवलोकनका लागि विद्यार्थी र ज्येष्ठ नागरिकका लागि २५, आन्तरिक पर्यटकका लागि ५० र विदेशी पर्यटकका लागि १५० रुपियाँ शुल्क तोकिएको छ ।

रेसुङ्गा नगरपालिकाले चालु आर्थिक वर्षमा एक करोड ९८ लाख आन्तरिक राजस्व उठाउने लक्ष्य लिएको छ । राजस्व शाखाका जमुना बस्नेतका अनुसार हालसम्म ८९ लाख ५३ हजार रुपियाँ राजस्व सङ्कलन भएको छ ।