खोज

 काठमाडौं, २४ मंसिर ।

सहकारी विभागले सबै सहकारी संस्थाका सञ्चालकहरूलाई दोहोरो वा तेहरो पद ग्रहण नगर्न निर्देशन दिएको छ ।

विभागले सहकारी ऐनअनुसार एक व्यक्तिले एक समयमा एक पदमै बस्नुपर्ने कानुनी व्यवस्थाको कार्यान्वयन सुनिश्चित गर्न स्पष्ट निर्देशन जारी गरेको हो ।

विभागले सोमबार गरेको निर्णयअनुसार सहकारी ऐन, २०७४ को दफा ४१(५) मा रहेको एक व्यक्ति एकै समयमा एक मात्र सहकारी संस्थाको सञ्चालक हुन सक्ने व्यवस्था र दफा ४४(१) खण्ड (ग) मा रहेको कसैलाई अर्को सहकारी संस्थामा सञ्चालक भएमा पूर्वपदमा निरन्तर बस्न नसक्ने प्रावधान तत्काल लागू गर्न सम्बन्धित सबै संस्थालाई भनिएको छ ।

विभाग र नियमनकारी निकायहरूबाट जारी निर्देशन तथा मापदण्ड पालना नगरी हालसम्म केही व्यक्तिहरू दोहोरो सञ्चालकका रूपमा कार्यरत रहेको पाइएकाले कानुनी व्यवस्था कार्यान्वयनमा कडाइ अपनाउन सबै सहकारी संस्था र सञ्चालक सदस्यलाई निर्देशन गरिएको विभागले जनाएको छ ।

सहकारी विभाग, राष्ट्रिय सहकारी नियमन प्राधिकरण, नेपाल राष्ट्र बैंक लगायतका नियमनकारी निकायहरूबाट जारी निर्देशिका तथा मापदण्ड विशेषगरी बचत तथा ऋण मुख्य कारोबार गर्ने सहकारी संस्थाका लागि बनेको नियामकीय मापदण्ड र २०८१ को परिच्छेद ७ मा रहेको एकै अवधिमा एक व्यक्तिले एकभन्दा बढी संस्थाको सञ्चालक वा पदाधिकारी हुन नपाइने व्यवस्था यथाशीघ्र लागू गर्न विभागले आग्रह गरेको छ ।

राष्ट्रिय सहकारी बैंकदेखि सहकारी संघ संस्थासम्मका दोहोरो पदका मुद्दा सार्वजनिक भएपछि विभागले यो नयाँ निर्देशन जारी गरेको हो ।

सहकारी क्षेत्रमा सुशासन प्रवर्द्धन गर्दै मूल्य, मान्यता र सिद्धान्तलाई मजबुत बनाउने तथा सहकारीलाई मुलुकको आर्थिक, सामाजिक र सांस्कृतिक रूपान्तरणको मेरुदण्डका रूपमा स्थापना गर्न कानुन पालन अनिवार्य भएको विभागले स्पष्ट पारेको छ ।

विभागका अनुसार कानुन तथा नियमनकारी निर्देशनको पालना गर्नु, स्वार्थको द्वन्द्वका कारण हुन सक्ने स्रोतको दुरुपयोग रोक्नु र सञ्चालक समितिमा कानुनअनुसार वैधानिकता कायम गर्नु प्रत्येक सदस्यको जिम्मेवारी हो ।

नियमनकारी निकायहरूले अनुगमन, निरीक्षण, नियमन तथा सुपरीवेक्षणको क्रममा उल्लिखित कानुनी व्यवस्था पालना भएको/नभएको अवस्था मूल्यांकन गरी उल्लंघन पाइएका सहकारी संस्थामाथि सहकारी ऐन तथा नियमावलीअनुसार आवश्यक कारबाही गर्न विभागले निर्देश गरेको छ ।