खोज

काठमान्डौ, १८ मंसिर ।

जेनजी प्रदर्शनका घटनाबारे छानबिन गर्न गठन गरिएको उच्चस्तरीय जाँचबुझ आयोगले काठमाडौँका तत्कालीन प्रमुख जिल्ला अधिकारी छवि रिजालसँग बयान लिएको छ । मङ्सिर १७ र १८ गते सिंहदरबारस्थित आयोगको कार्यालयमा बोलाएर रिजालसँग विस्तृत बयान लिइएको आयोग स्रोतले जनाएको छ ।

भदौ २३ र २४ मा भएको जेनजी प्रदर्शनका क्रममा बानेश्वर क्षेत्रमा किशोरको ज्यान जानेगरी गोली चलाउने निर्देशन दिएको आरोपमा रिजाल व्यापक आलोचनाको केंद्रबिन्दु बनेका थिए । सामाजिक सञ्जालमा चर्को विरोध भएपछि जिल्ला प्रशासन कार्यालय काठमाडौँको वेबसाइटबाट उनको तस्वीर समेत हटाइएको थियो ।

आयोगका पदाधिकारीले दुई दिनसम्म रिजालसँग सोधपुछ गरे पनि केही प्रश्नहरू बाँकी रहेको आयोगका एक सदस्यले बताए । उक्त सदस्यका अनुसार, “छवि रिजालको बयान अन्तिम चरणमा पुगेको छ, बाँकी केही प्रश्नहरूको उत्तरका लागि शुक्रबार फेरि बोलाइनेछ ।”

गौरीबहादुर कार्कीको संयोजकत्वमा रहेको आयोगले यसअघि सशस्त्र प्रहरी बलको कार्य विभाग प्रमुख नारायणदत्त पौडेल तथा प्रहरीका एआईजी सिद्धिविक्रम शाहसँग पनि बयान लिइसकेको छ । जेनजी प्रदर्शनका बेला शाह प्रहरी कार्य विभागका प्रमुख थिए ।

त्यसैगरी, आयोगले मङ्सिर १० मा राष्ट्रिय अनुसन्धान विभागका पूर्व प्रमुख (मुख्य अनुसन्धान निर्देशक) हुतराज थापासँग समेत बयान लिएको छ । आयोगले पूर्वमुख्यसचिव एकनारायण अर्यालसहित, राष्ट्रिय अनुसन्धान विभागका उपत्यका हेर्ने डीआईजी कृष्ण खनाल, उपत्यका प्रहरी कार्यालय रानीपोखरीका निमित्त प्रमुख ओम राना, सशस्त्र प्रहरीका डीआईजी सुरेश श्रेष्ठ तथा नेपाल प्रहरीका एसपी अपिल बोहरा र कुलदिप चन्दसँग पनि क्रमशः सोधपुछ गरिसकेको छ ।

आयोगका एक सदस्यका अनुसार हालसम्म करिब १५० जनासँग बयान तथा सोधपुछ प्रक्रिया सम्पन्न भइसकेको छ । सदस्यले भने, “अहिलेसम्म करिब १५० जनासँग विस्तृत रूपमा सोधपुछ गरिसकिएको छ ।”