सामग्री खोज्नुहोस्

काठमान्डौ, १६ मंसिर ।

पूर्वप्रधानमन्त्री डा. बाबुराम भट्टराईले नवयुवाहरूको बढ्दो असन्तोष र आक्रोशलाई राजनीतिक लाभका लागि भजाउने दुष्प्रयासले देशलाई आगामी दिनमा अझ ठूलो विस्फोट र अव्यवस्थातिर धकेल्न सक्ने चेतावनी दिएका छन् ।

उनका अनुसार पछिल्लो समय देखिएको जेनजी विद्रोह नेपाली अर्थ–राजनीतिक संरचनाको समग्र पुनर्संरचनाको माग हो, जसलाई दिनको घामझैँ छर्लङ्ग रूपमा प्रत्येक चेतनशील नागरिकले बुझ्न सक्ने अवस्था बनिसकेको छ ।

भट्टराईले भने, “अब कुनै पनि बहानामा पुरानो राजनीति, दल, नेतृत्व, कार्यशैली वा संस्कारलाई सामान्य डेन्टिङ–पेन्टिङ गरेर अथवा नयाँको नाममा खोक्रा पपुलिस्ट एजेन्डा अघि सारेर, अनि पुरानै राजतन्त्र–शैलीका चमत्कारिक देवदूत प्रस्तुत गरेर युवाहरूको आक्रोशलाई मोड्ने प्रयास अत्यन्त खतरनाक हुनेछ । यस्तो कदमले देशलाई झन् ठूलो विस्फोट र विग्रहतिर लैजान सक्छ ।”

संकटग्रस्त राज्य र समाजको सतहभित्र थिचिएको बहुआयामिक अन्तर्विरोधलाई वेवास्ता गर्दै समस्या छोपेर टार्ने प्रयास इतिहासमै कहिल्यै सफल नदेखिएको उल्लेख गर्दै उनले समयमै उचित राजनीतिक निकास र रूपान्तरण आवश्यक रहेको टिप्पणी गरेका छन् ।

डा. भट्टराईले निम्न कार्यहरू तदारुकताका साथ सम्पन्न गर्न ध्यानाकर्षण गराएका छन् :

१. जेनजी समूहहरूको तर्फबाट संयुक्त रूपमा सरकार समक्ष प्रस्तुत सहमतिपत्र (म्यानडेट) मा तुरून्त दुबैपक्षबाट हस्ताक्षर होस् र कार्यान्वयनमा अघि बढोस् ।

२. कार्की आयोगले भदौ २३ र २४ गतेको घटनाको छानबिन अहिले जस्तो कछुवा गतिमा हैन रकेटको गतिमा छिटो सम्पन्न गरोस् र त्यसका सिफारिसहरू तदारुकताका साथ कार्यान्वयन होस् ।

३. तोकिएको मितिमै स्वतन्त्र र निष्पक्ष निर्वाचन निर्बाध रूपमा सम्पन्न होस् ।

४. निर्वाचन पश्चात् पुराना दल र नेतृत्वलाई लोकतान्त्रिक ढङ्गले ससम्मान बिदाइ गरेर देशलाई अग्रगामी नयाँ लोकतान्त्रिक नेतृत्व प्रदान गर्न नयाँ तथा वैकल्पिक राजनीतिक शक्तिहरू बिचमा वृहत् ध्रुवीकरण, मोर्चा वन्दी, सहकार्य होस् ।